Европа комиссияси раиси Урсула фон дер Ляйен Россиянинг кенг кўламли ҳужуми бошланганининг тўртинчи йиллиги муносабати билан Украинага ташриф буюради. У Украина президенти Владимир Зеленскийнинг таклифини қабул қилган. Бу ҳақда 3 феврал куни Брюсселда унинг матбуот котиби Паула Пино маълум қилди.
Унинг сўзларига кўра, амалга ошириладиган ташриф “Европа Иттифоқининг Украина билан ҳамжиҳатлиги, шунингдек Россиянинг давом этаётган тажовузи олдидаги қатъияти ва бирдамлигининг рамзи” бўлади. Брюсселда ташриф тафсилотлари ҳали муҳокама қилинаётгани айтилди.
Жорий ҳафтада Еврокомиссия Россиянинг Украинага қарши уруши муносабати билан 20-пакет санкциялар бўйича таклиф киритади. Уни 24 феврал куни қабул қилиш режалаштирилган.
3 феврал куни Киевга НАТО бош котиби Марк Рютте ташриф буюрди.
Тўртинчи йилликка икки ярим ҳафта қолганида, 4–5 феврал кунлари Украина, Россия ва АҚШ делегациялари ўртасида навбатдаги тинчлик музокаралари ўтказилиши режалаштирилган. Шу билан бирга, сўнгги ҳафталарда Россия мамлакатдаги кучли совуқлар фонида Украина энергетик инфратузилмасига зарбаларни кучайтирган.
Россия 2022 йил 24 февралда Украинага кенг кўламли ҳужумни бошлаган.
Дурдона Ҳакимованинг жасади ва болалари Ўзбекистонга қайтарилди
Трампнинг икки-тўрт ой умри қолганми?
Саудия Арабистони АҚШнинг Эронга зарба беришидан манфаатдорми?
