АҚШ Федерал суди Трампга суиқасд қилишга уриниш иши бўйича Райан Раутни умрбод қамоқ жазосига ҳукм қилди

АҚШ Федерал суди Дональд Трампга суиқасд қилишга уриниш иши бўйича Райан Раутни умрбод қамоқ жазосига ҳукм қилди. Бу ҳақда Reuters хабар берди.

Ҳодиса 2024 йил сентябр ойида Флорида штатининг Уэст Палм Бич шаҳрида содир бўлган. Тергов маълумотларига кўра, Раут ўша пайтда Трамп бўлган голф майдони яқинида милтиқ билан яширинган. Гумонланувчини АҚШ Махфий хизмати ходими пайқаб қолган, шундан сўнг у қўлга олинган. Ҳодиса оқибатида Доналд Трамп жабрланмаган.

Суд Раутни бир нечта жиноий моддалар, жумладан, АҚШ президентлигига номзодни ўлдиришга уриниш, ўқотар қуролга ноқонуний эгалик қилиш ва федерал агентга қаршилик кўрсатиш бўйича айбдор деб топди. Унга муддатидан олдин озод қилиш ҳуқуқисиз умрбод қамоқ жазосига қўшимча равишда қурол эпизоди бўйича етти йиллик жазо тайинланди.

Раутнинг ўзи суд жараёнида қотиллик содир этиш ниятида бўлмаганини таъкидлади, бироқ суд бу далилларни асоссиз деб топди. Ҳукм эълон қилингандан сўнг, Раут суд залида ўзига зарар етказмоқчи бўлди, аммо федерал маршалл хизмати ходимлари томонидан тўхтатилди.