А Серияси Рим Папасининг вафоти туфайли қолдирилган ўйинларнинг янги санасини эълон қилди

А Серияси Рим Папаси Францискнинг вафоти туфайли қолдирилган миллий чемпионатнинг 33-туридан ўрин олган ўйинларнинг янги санасига аниқлик киритди.

Лига матбуот хизмати хабар беришича, бугунга режалаштирилган ўйинлар 23 апрель, чоршанба куни бўлиб ўтади.

Бу куни тўртта ўйин бўлиб ўтади: «Кальяри» – «Фиорентина», «Женоа» – «Лацио», «Парма» – «Ювентус» ва «Торино» – «Удинезе». Барча ўйинлар Тошкент вақти билан соат 21:30да бошланади.

Қайд этамиз, 23 апрель куни Италия кубоги ярим финалининг жавоб ўйини «Интер» – «Милан» ҳам бўлиб ўтади, у Тошкент вақти билан соат 00:00га режалаштирилган. Милан жамоаларининг биринчи учрашуви 1:1 ҳисобида якунланган эди.