27 ноябрь куни Экология ва иқлим ўзгариши миллий қўмитаси ҳузуридаги Чиқиндиларни бошқариш ва циркуляр иқтисодиётни ривожлантириш агентлиги директори Шарифбек Ҳасанов иштирокида брифинг ўтказилди. Брифингда экологик-санитария хавфсизлигини таъминлаш борасида амалга оширилган ишлар ҳақида маълумот берилди:
“Айни пайтда республика бўйича умумий 1824 гектар ер майдонида, жами 228 та чиқинди полигони мавжуд бўлиб, шундан 199 таси — маиший, 15 таси — заҳарли, кимёвий ва 14 таси — қурилиш чиқиндилари учун мўлжалланган.
💠 2024 йил ва 2025 йилнинг ўтган даврида Қорақалпоғистон Республикаси, Андижон, Бухоро, Қашқадарё, Наманган, Самарқанд, Тошкент, Фарғона ва Хоразм вилоятларидаги жами 47 та маиший чиқинди полигони рекультивация қилиниб, фаолияти тўхтатилди.
✅ Ушбу саъй-ҳаракатлар натижасида умумий ҳисобда 243 гектар ер майдони табиатга қайтарилди. Республика бўйича фойдаланишда бўлган 132 та чиқинди полигонларида доимий равишда тупроқ қатлами билан ёпиш ишлари амалга ошириб келинмоқда.
Жорий йилнинг “Тозалик ва озодалик ойлиги” доирасида 422 минг тоннадaн ортиқ чиқинди тозаланди. Шунингдек, 95 мингдан ортиқ маҳалла ҳудудлари, 61 мингта жамоат жойи тозаланди.
💡 9 та ҳудудда маиший чиқиндиларни термик қайта ишлаш орқали электр энергияси ишлаб чиқариш лойиҳаларини ишга тушириш борасида амалий чоралар кўрилмоқда. Мазкур ҳудудларга тўғридан-тўғри хорижий инвестицияларни жалб этган ҳолда, экологик вазиятни яхшилаш, чиқиндиларни қайта ишлаш соҳасида замонавий ечимлар ва технологияларни жорий этиш орқали электр энергияси ишлаб чиқарилиши белгиланган.
⚙️ Умумий қиймати 1,3 млрд АҚШ доллари бўлган ушбу инвестиция лойиҳаларининг қурилиш ишлари 2027 йилда якунланади. Ушбу лойиҳаларни рўёбга чиқариш орқали кунига 13 минг тонна чиқинди қайта ишланиб, йилига 2 млрд киловатт/соат электр энергияси ишлаб чиқарилади”.
Чиқиндиларни тўғри бошқариш ва самарали утилизaция қилиш нафақат ҳудудларимиз кўрки, балки атроф-мухит мусаффолиги учун ҳам ҳал қилувчи аҳамиятга эга. Соҳадаги тизимли ишлар атмосфера ҳавосини заҳарловчи зарарли газларнинг олдини олади. Санитар-экологик барқарорлик таъминланиши турли касалликлар ўчоғини бартараф этиб, аҳоли саломатлиги ва хавфсизлигини ишончли ҳимоя қилади. Зеро, тоза ҳудуд ва “яшил” иқтисодиётга интилиш — келажак авлодга соф табиат ва мусаффо ҳаво қолдиришнинг энг муҳим кафолатидир.
