2025 йилда молиявий ёрдам географияси: қайси ҳудудлар етакчи?

Ўтган йилда “Тадбиркорликни ривожлантириш компанияси” АЖ томонидан ажратилган молиявий ёрдам ҳудудлар кесимида турлича тақсимланганини кўриш мумкин.

“Ўзбекистон24” телеканали эълон қилган маълумотларга кўра, энг катта молиявий кўмак Фарғона вилоятига тўғри келиб, бу ҳудудда 383 млрд сўмлик 2 773 та лойиҳа қўллаб-қувватланган. Кейинги ўринда Сурхондарё вилояти қайд этилган бўлиб, бу ерда 370 млрд сўм миқдорида 2 441 та лойиҳа молиялаштирилган. Учинчи ўринни Қашқадарё вилояти эгаллаб, ҳудудда 323 млрд сўмлик 2 939 та лойиҳа молиявий ёрдам олган.

Шунингдек, компания томонидан республиканинг олис ва жадал ривожлантириладиган ҳудудларидаги тадбиркорлик лойиҳаларининг алоҳида қўллаб-қувватланаётгани ҳам эътиборга молик.

Бу кўрсаткичларни ҳудудларнинг иқтисодий фаоллиги, аҳолининг тадбиркорликка жалб этилиш даражаси ҳамда лойиҳа ташаббуслари сони билан изоҳлаш мумкин.

Ҳудудлар кесимидаги молиявий ёрдам ҳажми нафақат ресурсларнинг тақсимотини, балки жойлардаги бизнес муҳитининг фаоллигини ҳам акс эттиради. Ушбу кўрсаткичлар келгусида ҳудудлар ўртасидаги иқтисодий тафовутларни таҳлил қилишда муҳим омил бўлиб хизмат қилади.