"Бу ёлғон. Мен унинг гапларини эшитдим ва..."

АҚШ Давлат котиби Зеленскийнинг "ҳудудлар эвазига хавфсизлик кафолатлари" ҳақидаги гапларини ёлғон деб атади.

Марко Рубио Украина президенти Владимир Зеленскийнинг "Америка хавфсизлик кафолатларини беришдан олдин Киевдан ўз ҳудудларини Россияга топширишни талаб қилмоқда" деган баёнотини инкор этди.

Бу ҳақда жаҳон ахборот агентликлари хабар бермоқда.

"Бу ёлғон. Мен унинг гапларини эшитдим ва бундай фикрда эканлигидан афсусдаман, чунки у бу гаплар ҳақиқат эмаслигини билади", — дея Марко Рубионинг баёнотидан иқтибос келтирмоқда AFP агентлиги.

Ушбу баёнот Парижда бўлиб ўтган "G7" давлатлари ташқи ишлар вазирлари учрашувидан сўнг оммага олиб чиқилди.

"Украина учун мўлжалланган Америка қуроллари ҳозирча Яқин Шарққа, Эрон билан бўлаётган урушга йўналтирилмаяпти, бироқ келажакда бундай эҳтимол мавжуд", – деди Рубио.

Эслатиб ўтамиз, Зеленский шу ҳафта Reuters агентлигига берган интервьюсида Трамп маъмурияти Украинадан Донбасснинг қолган қисмидан қўшинларини олиб чиқишни талаб қилаётганини ва шундагина Қўшма Штатлардан хавфсизлик кафолатларини олиши мумкинлигини айтган эди.

Зеленскийнинг фикрича, ушбу қадам ҳам маънавий жиҳатдан нотўғри, ҳам хавфли бўлиб, нафақат Украинага, балки Трампнинг обрўсига ҳам зарар етказади.