Доналд Трамп АҚШ тарихида Олий суд мажлисида шахсан иштирок этган илк президент бўлди

1 апрел куни Трамп туғилиш орқали фуқаролик олиш ҳуқуқини чеклаш тўғрисидаги фармонининг қонунийлиги бўйича ўтказилган тингловда иштирок этди. У Оқ уйга қайтган илк кунида имзолаган ушбу ҳужжатни ўзининг қатъий миграция сиёсатидаги асосий қадам деб ҳисоблайди.

Трамп Олий суд биносига Оқ уйдан махсус кортеж билан келиб, залнинг оммавий қисмидаги биринчи қатордан жой олди. Суд мажлиси анъанавий "Oyez! Oyez! Oyez!" («Эшитинг! Эшитинг! Эшитинг!») ҳайқириғи билан бошланганда, у ҳам бошқалар қатори ўрнидан турди. Олий суд раиси Жон Робертс президентнинг ташрифига алоҳида тўхталмади.

Капитолий тепалигидаги Олий суд бино олдида Трампга қарши намойишчилар тўпланган, зал ичида эса хавфсизлик чоралари одатдагидан сезиларли даражада кучайтирилган.

Эслатиб ўтамиз, қуйи босқич суди Трампнинг ушбу фармонини блоклаб қўйган эди. Мазкур ҳужжат федерал органларга Қўшма Штатлар ҳудудида туғилган, аммо ота-онасидан ҳеч бири АҚШ фуқароси ёки "грин-карта" эгаси бўлмаган болаларга фуқаролик беришни тақиқлайди.