Озарбайжонда рус тилида таълим берувчи мактаблар босқичма-босқич ёпилмоқда

Озарбайжон мактабларида рус тилидаги таълим босқичма-босқич тугатилмоқда. Ҳозирда мамлакатда фаолият юритаётган 300 дан ортиқ рус тилидаги мактаблар тақдири катта савол остида қолмоқда.

Мактаб чатлари орқали ота-оналарга юборилаётган хабарларда айтилишича:

• Уч йил ичида мактаблар тўлиқ озарбайжон тилида таълимга ўтади;

• Рус тилидаги дарслар бекор қилинади;

• Рус синфларида дарс бераётган ўқитувчилар қайта тайёрлов курсларига юборилади.

Ҳозирда:

• 16 та мактаб фақат рус тилида таълим беради;

• Қолганларида эса икки тилда — рус ва озарбайжон тилларида ўқув жараёни олиб борилади.

Ҳукумат бу масала юзасидан ҳали расмий баёнот бермаган. Бироқ турли манбалар ушбу ўзгаришлар тахминан 2025 йилдан кучга киради, деб хабар тарқатмоқда.

Ота-оналар ва таълим соҳаси вакиллари орасида бу қарор катта муҳокамаларга сабаб бўлди. Айримлар буни миллий тилни ривожлантириш деб баҳолашса, бошқалар таълимда тил танлаш эркинлиги чекланаётганини таъкидламоқда.