Вашингтон Украинага қурол етказиб беришни вақтинча тўхтатди. Бу қарор АҚШ ўзининг ички мудофаа эҳтиёжлари ҳақида қайғуриш билан изоҳланди. Трамп кейинчалик бу етказиб беришлар қайта бошланишини маълум қилган бўлса-да, шундай деган: "Аввало, АҚШ ўзини етарли даражада қурол билан таъминлаши керак."
ОАВ маълумотларига кўра, тўхтатилган ёрдам таркибига Patriot ПВО тизими учун ўнлаб перехватчи ракеталар, Stinger портатив зенит тизимлари, юқори аниқликдаги артиллерия снарядлари, 100 дан ортиқ Hellfire ракеталари ҳамда NASAMS ПВО тизими ва F-16 учун ракеталар киради.
Patriot тизими учун ракеталар танқислиги Украина учун жуда оғир оқибатларга олиб келади, дейди Европа ташқи алоқалар кенгаши (ECFR) хавфсизлик бўйича мутахассиси Густав Грессель. Унинг DW нашрига берган изоҳида айтилишича, фақат 2024 йил июнининг ўзида Россия Украинага 330 дан ортиқ ракета учирган, шулардан 80 таси баллистик бўлган.
Россия томони асосан шундай ракеталарни ишлатмоқдаки, уларни фақат АҚШнинг Patriot ёки Франция ва Италиянинг Aster (SAMP/T) тизимлари тўхтатиши мумкин. Аммо Грессель таъкидлаганидек, Франция ва Италияда йиллик ишлаб чиқариш ҳажми Америкага нисбатан анча кам. Шу боис Украинада миқдор жиҳатидан жиддий муаммо юзага келмоқда.
Киев авиация институти етакчи илмий ходими Валерий Романенко DW билан суҳбатда шундай деган:
"Агар биз антиракета олмасак, ҳар куни муҳим объектларимиз йўқ қилинади, инсонларимиз ҳалок бўлади. Чунки бизнинг уларни тўхтатиш учун ҳеч қандай воситамиз қолмайди."
DW суҳбатдоши бўлган айрим экспертлар ечим сифатида Европа ПВО тизимларини такомиллаштириш ва яхшилаш зарурлигини таъкидлашмоқда. Бироқ бу жараён вақт талаб этади. Яқин кунларда Украина қуролли кучларига мавжуд қурол-аслаҳаларни тежаш ва эҳтиётлаш режимига ўтишга тўғри келиши мумкин.
Аёлларнинг пенсия ёши яна 6 ойга оширилди
Қирғизистонда фавқулодда ҳолат эълон қилинди
Элдор Шомуродовнинг янги жамоаси маълум. У Италиядан кетмоқда
