Googleнинг собиқ муҳандиси Xитойга жосуслик қилганликда айбланмоқда

Google компаниясининг собиқ муҳандиси жосусликда айбланди. У Googleдан сунъий интеллект (АI) технологиясини ўғирлаганликда ва Хитойнинг сунъий интеллект саноатини ривожлантиришга ёрдам берганликда айбланмоқда. Бу ҳақда Сингапурнинг Lianhe Zaobao нашри хабар берди.

Нашрнинг ёзишича, АҚШ Адлия вазирлиги 4 февраль куни Googleнинг собиқ дастурий таъминот муҳандиси Дин Линьвэйга янги айбловлар қўйилганини маълум қилган. Унга аввалроқ тижорат сирларини ўғирлашда тўртта айблов қўйилган эди. Ҳозир унга еттита иқтисодий жосуслик ва еттита тижорат сирини ўғирлаш айбловлари қўйилган.

АҚШ Адлия вазирлигига кўра, агар айбдор деб топилса, у тижорат сирини ўғирлаганлик учун 10 йилгача қамоқ жазоси ва 250 минг долларгача жаримага тортилиши мумкин. Иқтисодий жосуслик бўйича ҳар бир айблов 15 йиллик қамоқ жазоси ва камида 5 миллион доллар жаримани ўз ичига олади.

Айблов хулосасига кўра, Google 2019 йилда Дин Линьвэйни дастурий таъминот муҳандиси сифатида ёллаган. 2022 йилнинг майидан 2023 йилнинг майигача у Google Cloud ҳисобига 1000 дан ортиқ файл юклади. Файллар орасида Googleнинг махфий тижорат маълумотлари ҳам бор эди.

Айблов хулосасига кўра, Дин Линьвэй Хитой ҳукуматидан фойда олиш мақсадида Google компаниясининг тижорат сирларини ўғирлаган. У Хитойга сунъий интеллект моделларини етказиб бериш учун Google компаниясига суперкомпьютер маълумотлар марказларидан фойдаланиш имконини берувчи аппарат ва дастурий таъминот технологияларини ўғирлаганликда гумон қилинмоқда.

Маълум бўлишича, Дин Линьвэй Googleда ишлаган вақтида Хитойнинг икки компанияси билан яқин алоқада бўлган ва 2022 йил июнь ойида у Пекиндаги стартапнинг бош техник директори лавозимида ҳам ишлаган. 2023 йил май ойида у Шанхайда сунъий интеллект ва машиналарни ўрганишга ихтисослашган ўзининг технологик компаниясига асос солди.

Айблов хулосасида, шунингдек, Дин Линьвэй Хитой ҳукумати ходимларини қўллаб-қувватлаш дастурига ариза топширгани айтилади. Дастур чет элда тадқиқот олиб борган ва олган билим ва тадқиқот ютуқларини Хитойга олиб келган олимларни молиявий қўллаб-қувватлашга қаратилган.