Ошпазларнинг эътиборсизлиги туфайли 78 киши ҳалок бўлди

Туркиянинг Карталкай тоғ чанғи курортидаги Grand Kartal меҳмонхонасида юз берган йирик ёнғинга ошпазларнинг эътиборсизлиги сабаб бўлган.

Бу ҳақда "Sabah" газетаси тергов маълумотларига асосланиб хабар берди.

Унинг маълумотларига кўра, ёнғин 21 январь куни маҳаллий вақт билан соат 03:21 да ошхонада ошпазлар меҳмонлар учун грилда нонушта тайёрлаётган пайтда юз берган. Ёниб кетган ёққа сув сепишгани бутун хонага ёнаётган массанинг сачрашига олиб келган. Ваҳимага тушган ошпазлар кўчага қочиб чиқишган, ёнғин тез орада меҳмонхонанинг барча қаватларига тарқалган, бинодаги ёнғин хавфи сигнализацияси эса ўчирилган экан.

Ёнғин иши бўйича тергов доирасида 19 киши қамоққа олинган. Улар орасида меҳмонхона эгаси, бошқарувчи, курорт жойлашган Болу шаҳри мерияси вакиллари ҳам бор. Grand Kartal меҳмонхонасидаги ёнғин оқибатида 78 киши ҳалок бўлган, уларнинг аксарияти болалар, 50 дан ортиғи жароҳат олган. Ёнғин содир бўлган пайтда меҳмонхонада жами 238 нафар меҳмон бўлган.