Yuzlab million yevrolik xaridlar: qaysi futbolchilar sarflangan mablag‘ni oqlamoqda?

Yozgi transfer oynasida Yevropa klublari bir qator shov-shuvli kelishuvlarni amalga oshirdi. Yangi jamoasiga ko‘chib o‘tgan ayrim futbolchilar qisqa fursatda o‘zini ko‘rsatishga ulgurgan bo‘lsa, boshqalari hanuz munosib o‘yin namoyish eta olmayapti. Transfer oynasi yopilganiga ikki oy to‘lgan bir paytda Euro Football nashri yirik xaridlarning dastlabki natijalarini tahlil qildi.

O‘zini oqlagan transferlar

Rodri Ernandes ("Manchester Siti" → "Barselona", 60 million yevro)

Narx va sifat mutanosibligi bo‘yicha yozning eng muvaffaqiyatli transferi, shubhasiz, Rodrining "Barselona"ga o‘tishi bo‘ldi.

Kataloniyaliklarning yosh tarkibiga o‘yinni boshqara oladigan tajribali futbolchi yetishmayotgandi. 30 yoshli ispaniyalik yarim himoyachi bu bo‘shliqni to‘ldirdi. Avgust oyining ikkinchi yarmida "Manchester Siti"dan kelgan Rodri dastlabki uchrashuvlardanoq jamoaga tez moslashdi.

Angliya Premyer-ligasidagi hozirgi narxlar bilan solishtirganda, 60 million yevro ancha maqbul summa hisoblanadi. Rodri yangi jamoasining mavsumdagi barcha 13 uchrashuvida maydonga tushdi.

Morgan Rojers ("Aston Villa" → "Chelsi", 138 million yevro)

23 yoshli hujumkor yarim himoyachi ham moslashish uchun ko‘p vaqt sarflamadi. Yozning ikkinchi eng qimmat transferi bo‘lgan angliyalik futbolchi Premyer-ligadagi dastlabki to‘rt o‘yinining barchasida samarali harakati bilan ajralib turdi — 3 ta gol va 1 ta assist.

Angliya Liga kubogi doirasidagi uchrashuvlardan birida esa u atigi 10 daqiqa ichida uchta golli uzatmani amalga oshirdi. Umuman olganda, Rojers barcha musobaqalarda 12 ta o‘yinda 6 ta gol va 4 ta assist qayd etdi.

"Manchester Siti"ning yangi yarim himoyachilari

"Shaharliklar" yozda maydon markazini kuchaytirish uchun jami 375 million yevro sarfladi. Klub Enso Fernandesni 145 million, Elliot Andersonni 135 million va Ayyub Buaddini 95 million yevroga xarid qildi.

Fernandes va Anderson darhol asosiy tarkibdan joy oldi. Yosh marokashlik Buaddi esa ko‘proq kelajakni ko‘zlab olingani sababli hozircha muntazam o‘yin amaliyotiga ega emas.

Ensoning o‘yinida ayrim kamchiliklar ko‘zga tashlanayotgan bo‘lsa-da, Anderson o‘zining ishonchli harakatlari bilan murabbiylar ishonchini oqlamoqda.

Entoni Gordon ("Nyukasl" → "Barselona", 80 million yevro)

"Barselona"ning yozdagi ilk xaridi dastlab ko‘pchilikda savollar uyg‘otgandi. Sababi, kataloniyaliklar ijarada o‘ynagan Markus Reshfordni "Manchester Yunayted"dan 30 million yevroga sotib olish imkoniyatiga ega edi.

Biroq klub rahbariyati qimmatroq variantni tanladi va bu qaror o‘zini oqladi. Gordon La Ligada "Barselona" safidagi dastlabki to‘rt uchrashuvida to‘rtta golli uzatma qayd etib, XXI asrda bunday natijaga erishgan uchinchi futbolchiga aylandi.

Yan Diomande ("Real Madrid")

Madrid klubi tarixidagi ikkinchi eng qimmat transfer hisoblangan 19 yoshli ivuarlik futbolchi mavsumni zaxira o‘rindig‘ida boshlagandi. Biroq Vinisiusning muvaffaqiyatsiz o‘yinlari va to‘rt uchrashuvlik diskvalifikasiyasi Diomandega o‘zini ko‘rsatish imkonini berdi.

Yosh vinger asosiy tarkibdan mustahkam o‘rin egallab, so‘nggi oltita uchrashuvda 4 ta gol va 3 ta assist qayd etdi.

Hozircha kutilgan natijani bermagan transferlar

Bredli Barkola ("Liverpul")

Fransiyalik vinger "Liverpul" tarixidagi eng qimmat xaridlardan biriga aylangan bo‘lsa-da, hozircha o‘z salohiyatini to‘liq namoyon eta olmayapti.

Barkola dastlabki beshta uchrashuvda birorta ham samarali harakat qayd etmadi. Biroq keyingi o‘yinlarda vaziyat o‘zgara boshladi. U Chempionlar ligasining ikkinchi turida LASKga qarshi bahsda (6:0) xet-trikka erishdi. Shundan so‘ng Premyer-ligada yana ikkita golli uzatma amalga oshirdi.

Shunga qaramay, fransuz futbolchisining umumiy natijalari hali unga sarflangan katta mablag‘ni to‘liq oqlamaydi.

Sandro Tonali va Mateush Fernandesh ("Tottenxem", jami 207 million yevro)

London klubi yozda ushbu ikki yarim himoyachi uchun 207 million yevro sarfladi. Har ikkala kelishuv ham "Tottenxem" tarixidagi rekord transferlarga aylandi.

Biroq futbolchilar mavsum boshida o‘zlaridan kutilgan darajada o‘ynay olmadi. Buning ustiga, jamoaning o‘zi ham dastlabki turlarda qoniqarsiz natijalar qayd etdi.

So‘nggi vaqtlarda esa vaziyat ijobiy tomonga o‘zgarmoqda. Roberto De Dzerbi shogirdlari ketma-ket uchta g‘alabaga erishib, turnir jadvalining quyi pog‘onalaridan yuqori yarmiga ko‘tarildi. Tonali va Fernandeshning o‘yinida ham o‘sish kuzatilmoqda.

Shunday bo‘lsa-da, hozircha bu ikki futbolchining maydondagi harakatlari ular uchun sarflangan 207 million yevroga to‘liq mos keladi, deb aytish qiyin.

Xulosa

Yozgi transferlardan keyingi dastlabki ikki oy ayrim klublar sarflagan mablag‘lar o‘zini oqlayotganini ko‘rsatdi. Rodri, Rojers, Gordon va Diomande yangi jamoalarida qisqa vaqt ichida muhim futbolchilarga aylandi.

Barkola, Tonali va Fernandesh esa hali o‘zlaridan kutilayotgan natijalarni to‘liq namoyish etgani yo‘q. Biroq mavsumning asosiy qismi hali oldinda va bu transferlarga yakuniy baho berishga erta.