Savol: Kecha ishxonamdagi hamkasbim bilan uning Jentra rusumli avtomashinasida tushlikdan qaytayotganimizda yo‘l-transport hodisasi sodir bo‘ldi. Biz bilan bir yo‘lda yonma-yon harakatlanayotgan Neksiya avtomashinasi haydovchisi belgilangan qoidalarni buzgan holda, hamkasbimning avtomashinasiga ancha miqdorda zarar yetkazib, harakatda davom etib, hodisa yuz bergan joydan ketib qoldi. Haydovchi yo‘l-transport hodisasi yuz bergan joydan ketib qolganligi uchun qonunda javobgarlik belgilanganmi?
Ismi va manzili sir tutildi
Savolga Oliy sud bosh konsultanti Akrom Aripov javob berdi:
Albatta, yo‘l-transport hodisasi yuz bergan joydan ketib qolganligi uchun qonunda javobgarlik belgilangan. Amaldagi Ma’muriy javobgarlik to‘g‘risidagi kodeksning 137 – moddasi talabiga ko‘ra, yo‘l-transport hodisasi qatnashchilarining belgilangan qoidalarni buzgan holda hodisa yuz bergan joydan ketib qolishi, — bazaviy hisoblash miqdorining o‘n besh baravari miqdorida jarima solishga sabab bo‘ladi.
Shuningdek, yo‘l-transport hodisasi qatnashchilarining belgilangan qoidalarni buzgan holda hodisa yuz bergan joydan ketib qolishi, agar ushbu yo‘l-transport hodisasi jabrlanuvchiga yengil tan jarohati yoki ancha miqdorda moddiy zarar yetkazilishiga olib kelgan bo‘lsa, — bazaviy hisoblash miqdorining o‘ttiz baravari miqdorida jarima solishga yoki transport vositalarini boshqarish huquqidan bir yil muddatga mahrum etishga yoxud o‘n besh sutkagacha muddatga ma’muriy qamoqqa olishga sabab bo‘ladi.
