AQSh Rossiya va Ukrainani zudlik bilan o‘t ochishni to‘xtatishga chaqirdi

shuningdek, AQSh urush faqat muzokaralar yo‘li bilan yakunlanishi kerakligini bildirdi

​Bu haqda BMT Xavfsizlik Kengashi yig‘ilishida AQSh vakili Den Negrea bayonot berdi.

​“Qo‘shma Shtatlar Rossiya-Ukraina urushining so‘nggi paytlarda keskinlashganidan, jumladan, o‘tgan haftada Rossiyaning dron va raketa zarbalari oqibatida 20 dan ortiq tinch aholi vakillari halok bo‘lgani va yana ko‘plab insonlar jarohatlanganidan hamon xavotirda”, — dedi u.

​Negrea, shuningdek, AQSh Davlat kotibi Marko Rubio so‘zlaridan iqtibos keltirib, Rossiyaning Ukrainaga bostirib kirishi “strategik falokat”ga aylanganini ta’kidladi.

​“Uning neftni qayta ishlash zavodlari yonmoqda va Rossiya hozirda har oy 5000 kishini yo‘qotmoqda. Moskva jang maydonida o‘z maqsadlariga erisha olmaydi. Vaziyatning keskinlashishi buni o‘zgartirmaydi va faqat falokatni yanada chuqurlashtirish xavfini tug‘diradi. Bu urush hozir tugashi kerak. Yetar endi. Afsuski, muzokaralar shu vaqtgacha tinchlikka erishish uchun zarur bo‘lgan kelishuvlar va yon berishlar almashinuviga olib kelmadi”, — deb bayonot berdi AQSh vakili.

​Uning qo‘shimcha qilishicha, Vashington “har ikki tomonni zudlik bilan urushni muzokaralar orqali yakunlashga olib keladigan har tomonlama o‘t ochishni to‘xtatishga kelishib olishga” chaqiradi.

​“O‘ch olish, keskinlashuv, zo‘ravonlik va o‘limlar zanjiri to‘xtashi kerak”, — deya ta’kidladi Negrea.

​Uning so‘zlariga ko‘ra, AQSh barcha davlatlarni Rossiyaning harbiy harakatlarini qo‘llab-quvvatlashni to‘xtatishga ham chaqirmoqda.

​“Bu Moskvaga Ukrainada foydalanish uchun dronlarni yetkazib bergan Eronga va minglab yollanma askarlarining Rossiya tomonida jang qilishiga ruxsat berib, urushni davom ettirayotgan Kubaga tegishlidir. Bu urush faqat muzokaralar yo‘li bilan yakunlanishi mumkin. Qo‘shma Shtatlar, avvalgidek, ushbu urushning uzoq muddatli yakunlanishiga ko‘maklashishga tayyor”, — dedi amerikalik diplomat.
​