Yaponiyada qorlarni tozalash uchun harbiylar safarbar etildi

Yaponiyada kuchli qor yog‘ishi 46 kishining hayotiga zomin bo‘ldi. Qorlarni tozalash uchun harbiylar safarbar etildi, deb xabar berdi BILD.

Yaponiyada kuchli qor yog‘moqda, bir necha metr balandlikdagi qor uyumlari, baxtsiz hodisalar tez-tez qayd etilmoqda.

Foto: BILD

Hozirning o‘zida 46 kishi halok bo‘ldi, 558 kishi jarohat oldi. OAV ma’lumotlariga ko‘ra, ayrim odamlarning jasadlari qor ostida bir necha kun davomida qolib ketgan, chunki ularni o‘z vaqtida topish imkoni bo‘lmagan.

Foto: BILD

Yaponiya rasmiylarining ma’lumotiga ko‘ra, ko‘plab fojiali holatlar binolar tomlaridan qulagan qalin qor odamlarni bosib qolishi natijasida sodir bo‘lgan. Shuningdek, jabr ko‘rgan hududlarda uylarning qulagani haqida ham ma’lumotlar bor.

Foto: BILD

Yanvar oyi oxiridan beri Yaponiyaning shimoliy qismida misli ko‘rilmagan qor yog‘yapti. Ko‘pgina hududlarda qor yog‘ishi to‘xtamadi. Aomori va Ajigasava kabi shaharlarda bu qishda qor qoplamining balandligi bir metrdan oshdi. Ba’zi tumanlarda qor qalinligi to‘rt yarim metrga yetdi.

Foto: BILD

Aomori gubernatori Soichiro Miyashita shahar hukumati ko‘chalar, uylar va temir yo‘l izlarini qordan tozalashda qiynalayotganini aytdi va fevral oyi boshida Yaponiya harbiylaridan yordam so‘radi. Hozirda askarlar qor tozalash ishlarida yordam beryaptilar, eng avvalo qariyalar va yolg‘iz yashovchilarga yordam berilyapti.