Yaponiyada aholi soni keskin qisqarishda davom etmoqda — o‘tgan yili rekord darajada pasayish qayd etildi

Yaponiya aholisi yildan-yilga kamayib bormoqda. 2024 yilda mamlakat aholisi 908 574 nafarga qisqarib, umumiy soni 120 millionga yetdi. Bu — mamlakat tarixidagi eng yuqori yillik kamayish hisoblanadi. Bu haqda Yaponiyaning Ichki ishlar va kommunikasiyalar vazirligi ma’lum qildi.

2009 yilda 126,6 millionga yetgan aholi soni shundan beri ketma-ket 16 yil davomida pasaymoqda. Bu holat mamlakat iqtisodiyotiga, pensiya va tibbiyot tizimiga jiddiy bosim o‘tkazmoqda.

2024 yilda Yaponiyada faqat 687 689 nafar chaqaloq tug‘ilgan bo‘lsa, vafot etganlar soni deyarli 1,6 million nafarni tashkil etdi. Bu esa aholi qarishining davom etayotganini ko‘rsatadi. Hozirda aholining 30 foizini keksalar tashkil qiladi, mehnatga layoqatli yoshdagi insonlar esa tobora kamaymoqda.

Mutaxassislarning ta’kidlashicha, Yaponiyaning tug‘ilish darajasi 1970-yillardan beri doimiy ravishda past. Bu esa aholi sonini tabiiy tarzda tiklash imkoniyatini deyarli imkonsiz qilmoqda. Hatto tug‘ilishlar keskin oshsa ham, aholi qisqarishi yana bir necha o‘n yil davom etishi kutilmoqda.

Ayrim ekspertlar mamlakatdagi aholi yetishmovchiligini migrasiya orqali to‘ldirish mumkinligini ta’kidlamoqda. Ammo Yaponiya — ommaviy migrasiyani ehtiyotlik bilan qabul qiladigan konservativ jamiyat. Shunga qaramay, hukumat so‘nggi paytlarda xorijliklar uchun raqamli ish viza tizimini joriy etdi va malakali mehnatkashlar jalb etish bo‘yicha strategiyani ishlab chiqdi.

2024 yilda Yaponiyada xorijliklar soni 10%ga ko‘payib, 3,6 million nafarga yetdi. Hukumat modellariga ko‘ra, 2070 yilga kelib aholi 30 foizga qisqaradi, ammo bu jarayonni migrasiya hisobiga sekinlashtirish mumkin.