Yana bir ota aliment puli o‘rniga farzandlariga 6 xonali uy sovg‘a qildi

Xorazm viloyati, Yangibozor tumanida yashovchi ota ikki nafar farzandlarining 18 yoshga qadar bo‘lgan davri uchun to‘lanishi lozim bo‘lgan aliment puli o‘rniga umumiy yer maydoni 600 kv.metr bo‘lgan 6 xonali uyni sovg‘a qildi.

Majburiy ijro byurosining Yangibozor tumani bo‘limi ish yurituvidagi fuqarolik ishlari bo‘yicha Urganch tumanlararo sudining buyrug‘iga asosan qarzdor Q.A.dan undiruvchi fuqaro G.S. foydasiga ikki nafar voyaga yetmagan farzandlari uchun aliment undirish belgilangan.

Byuroning Yangibozor tumani bo‘limi davlat ijrochisi tomonidan qarzdor bilan o‘tkazilgan targ‘ibot tadbiri davomida O‘zbekiston Respublikasi Vazirlar Mahkamasining “Alimentlarni oldindan to‘lash, shuningdek, aliment to‘lash majburiyatini ta’minlash bo‘yicha garov shartnomasini tuzish tartibi to‘g‘risidagi nizomni tasdiqlash haqida”gi Qaroriga asosan voyaga yetmagan bolalar ta’minoti uchun alimentlarni oldindan to‘lash imkoniyati mavjudligi tushuntirilgan.

Davlat ijrochisining olib borgan ijro harakatlari, shuningdek, tushuntirish ishlari samara berib, tomonlarning o‘zaro kelishuviga ko‘ra, ota o‘z farzandlarining 18 yoshga to‘lguniga qadar belgilangan aliment to‘lovi uchun Yangibozor tumani, “Xalqobod” MFYda joylashgan umumiy yer maydoni 600 kv.metr bo‘lgan 6 xonali uyni turmush o‘rtog‘iga notarial tartibda rasmiylashtirib berdi.

G‘ayrat Madrimov, Byuroning Yangibozor tumani bo‘limi boshlig‘i