Yadroviy boshi berk ko‘cha: AQSh va Eron inqiroz ostonasida

AQSh Eronning vositachilar orqali yadro dasturi bo‘yicha muzokaralar o‘tkazish tashabbusini sinchkovlik bilan o‘rganmoqda. Ayni paytda, prezident Donald Tramp islom respublikasiga harbiy zarba berish haqida qaror qabul qilishi ehtimolini hisobga olib, Yaqin Sharqdagi harbiy mavjudligini kuchaytirmoqda. Bu haqda Axios portaliga AQSh mansabdor shaxslari ma’lum qildi.

"Xat almashuvidan so‘ng Eron tomoni bilan muloqotni boshlash va o‘zaro ishonchni mustahkamlash uchun mumkin bo‘lgan qadamlarni tahlil qilmoqdamiz," - dedi nashr manbalari.

Portal ma’lumotlariga ko‘ra, Oq uyda ikki guruh o‘rtasida bahslar ketmoqda: ba’zilar Eron bilan kelishuvga erishish mumkinligini ta’kidlab, muzokaralar o‘tkazishni yoqlamoqda; boshqalar esa buni behuda vaqt sarflash deb bilmoqda va Eronning yadroviy ob’ektlariga zarba berishni talab qilmoqda.

Axios ta’kidlashicha, bir vaqtning o‘zida Pentagon Yaqin Sharqdagi o‘z mavqeini faol ravishda mustahkamlamoqda. Agar Tramp muzokaralar muddati tugadi deb hisoblasa, Tehron yon berishni rad etgan taqdirda, u Eronning yadro infratuzilmasini "keng miqyosda bombardimon qilish" tahdidini amalga oshirishi mumkin.

Amaldorlar, shuningdek, Tramp ma’muriyati vositachilarsiz to‘g‘ridan-to‘g‘ri muzokaralarni samaraliroq yo‘l deb bilishini, biroq Eron taklif qilgan formatni rad etmasligini va ilgari bo‘lgani kabi Ummon vositachiligiga rozi bo‘lishga tayyorligini qayd etishdi.