Jodugarlar ovimi? — AQShda kattalar qo‘zg‘aldi. Mask va Trampdan Fransiyaga hujum

Tramp, Mask va Vens o‘ta o‘ng partiya yetakchisi Marin Le Penga oid sud qaroridan so‘ng Fransiyani tanqid qildi.

"Bu menga qarshi ishlatilgan o‘sha ssenariy asosida amalga oshirilmoqda. Sud qarori “jodugarlar ovining” namunasi va Yevropa so‘llarining sud tizimidan so‘z erkinligini bo‘g‘ish hamda siyosiy raqiblarini senzura qilish uchun foydalanishini ko‘rsatuvchi holatdir", — deb yozdi AQSh prezidenti Donald Tramp Truth Social platformasida.

Trampning bu bayonotini Ilon Mask repost qildi va "Le Penga erkinlik!" deb izoh qo‘shdi.

Qo‘shma Shtatlar vise-prezidenti Jey Di Vens esa, agar Yevropa mamlakatlari muxolifat yetakchilarini qamashda davom etsa, u holda AQSh va Yevropa o‘rtasidagi munosabatlar keskinlashishini aytdi.

"Fransiya adliya tizimidan qo‘lingizni torting, janob Tramp!", — deya javob berdi Fransiyaning dengizorti hududlari bo‘yicha vaziri Manuyel Vals. Uning so‘zlariga ko‘ra, amerikalik siyosatchilarning qo‘llab-quvvatlashi Marin Le Penga yordam bermaydi. Valsning fikricha, bu holat xalqaro o‘ta o‘ng harakat mavjudligini va u jamoat muhokamalariga ta’sir o‘tkazishga urinayotganini ko‘rsatadi.

Eslatib o‘tamiz, 31 mart kuni Fransiyaning o‘ta o‘ng “Milliy birlashuv” partiyasi yetakchisi Marin Le Pen Yevropa Ittifoqi mablag‘larini o‘zlashtirish va partiyani yashirin moliyalashtirishda aybdor deb topilgandi. Parij sudi Le Penga nisbatan to‘rt yil shartli ravishda ozodlikdan mahrum qilish va 100 ming yevro jarima to‘lash jazosini tayinlangan. Shuningdek, unga besh yil mobaynida saylovlarda ishtirok etish taqiqlangan.