Xitoyliklar Germaniyadagi Volkswagen zavodlarini sotib olmoqchi

Xitoy kompaniyalari va hokimiyat organlari yopilishi rejalashtirilgan Germaniya avtomobil zavodlariga, ayniqsa, Volkswagen konserni korxonalariga qiziqish bildirmoqda, deb yozadi Reuters Xitoy hukumatining rejalari bilan tanish bo‘lgan manbaga tayanib.

Germaniya zavodlarini sotib olish Xitoyga Germaniya avtomobil sanoatida o‘z ta’sirini kuchaytirish imkonini berardi. Xitoy kompaniyalari allaqachon Germaniya iqtisodiyotining turli sohalariga sarmoya kiritayotganiga qaramay, Germaniyada avtomobil ishlab chiqarish ular uchun hamon yangi ufq bo‘lib qolmoqda.

Reuters agentligining yozishicha, Germaniya avtomobil zavodlariga sarmoya kiritish Xitoyning eng nozik siyosiy qadami bo‘lishi mumkin. Uzoq vaqt davomida Germaniyaning sanoat qudrati ramzi hisoblangan Volkswagen iqtisodiy pasayish va yashil texnologiyalarga o‘tish tufayli qiyinchiliklarga duch keldi. Germaniyada elektromobillar ishlab chiqarish Xitoy kompaniyalariga Yevropa Ittifoqining import avtomobillarga soliqlaridan qochish imkonini berishi mumkin. Bu esa ularning Yevropa avtomobil ishlab chiqaruvchilariga nisbatan raqobatbardoshligini yanada oshiradi.

Volkswagen xarajatlarni qisqartirish dasturi doirasida Drezden va Osnabryukdagi zavodlarni yopish imkoniyatini ko‘rib chiqmoqda, ammo Osnabryukdagi zavodni xitoylik xaridorga sotishga tayyor. Kompaniya vakili uning maqsadi firma va uning xodimlari manfaatlarini hisobga oladigan hayotiy yechim topish ekanligini tasdiqladi. Shu bilan birga, Xitoy kompaniyalari ish o‘rinlarini kafolatlash va ishlab chiqarishni saqlab qolishni talab qilayotgan Germaniya kasaba uyushmalarining munosabatidan xavotirda.

Reuters‘ning yozishicha, ko‘plab Xitoy avtomobil ishlab chiqaruvchilari Yevropada zavodlar ochish imkoniyatini ko‘rib chiqmoqda. Ba’zilari Vengriya va Turkiya kabi arzonroq mamlakatlarda zavodlar qurmoqda.