Xitoy Ukrainadagi mojaroning yanada avj olishiga yo‘l qo‘ymaslikka chaqirdi

Xitoy Ukrainadagi mojaroning nazoratdan chiqib ketishi va yanada avj olishining oldini olishga chaqirdi va siyosiy yechimni qo‘llab-quvvatlashini bildirdi.

Bu haqda Xitoyning BMTdagi doimiy vakili o‘rinbosari Sun Ley ma’lum qildi.

"Ukraina inqirozining yanada avj olishiga va nazoratdan chiqib ketishiga yo‘l qo‘yilmasligi kerak. Barcha tegishli tomonlar va xalqaro hamjamiyat siyosiy yechim topish uchun kuchlarini birlashtirishi kerak", dedi diplomat.

Uning so‘zlariga ko‘ra, hozirgi asosiy vazifa keskinlikni kamaytirish, mojaroning jangovar zonadan tashqariga tarqalishining oldini olish va avj olishining oldini olishdir.

Sun Ley tomonlar o‘rtasidagi jiddiy kelishmovchiliklarga qaramay, yaqinda ba’zi aloqalar amalga oshirilganini ta’kidladi.

"Umid qilamizki, manfaatdor tomonlar aloqalarni davom ettiradilar, siyosiy iroda ko‘rsatadilar, asta-sekin umumiy pozisiyani rivojlantiradilar va keng qamrovli, uzoq muddatli va qonuniy jihatdan majburiy tinchlik kelishuviga erishish uchun birgalikda ishlaydilar", deb ta’kidladi u.

Xitoylik diplomatning so‘zlariga ko‘ra, Rossiya va Ukraina o‘rtasidagi tinch-totuv yashash yagona real yechimdir.

Shuningdek, u ikkala tomonning ham qonuniy xavfsizlik muammolarini hisobga olishga, inqirozning asosiy sabablarini bartaraf etishga va muvozanatli, samarali va barqaror mintaqaviy xavfsizlik arxitekturasini yaratishga chaqirdi.