Voice of America agentligi 1 400 ta ish o‘rnini qisqartirdi

Donald Tramp ma’muriyati Voice of America (VOA) tarmog‘ida keng miqyosli ishchi qisqartirishni amalga oshirdi. Hozirda agentlik xodimlarining 85 foizi, jumladan Yaqin Sharqdagi vaziyatga oid faoliyatga jalb qilingan fors tilidagi xizmat xodimlari ham ishdan bo‘shatildi.

20 iyun kuni AQSh prezidenti Donald Tramp ma’muriyati Voice of America agentligida 1 400 nafar xodimga ishdan bo‘shatilish haqida rasmiy xabarnomalar yubordi. Bu agentlikning umumiy ishchi kuchi 85 foizga qisqartirilganini anglatadi.

Ishdan bo‘shatilganlar orasida agentlikning fors tilidagi xizmatida faoliyat yuritgan va Yaqin Sharqdagi Isroil-Eron ziddiyati ortidan faqatgina o‘tgan haftada ishga chaqirilgan xodimlar ham bor.

Qaror AQSh Xalqaro Media Agentligi (USAGM)ga tegishli bo‘lib, bu tashkilotga Voice of America va Kuba Teleko‘rsatuvlar Idorasi (OCB) kiradi. Ma’lum qilinishicha, umumiy qisqartirishga qaramay, OCB tarkibidagi 33 nafar xodimning hech biri ishdan bo‘shatilmagan.

Ma’muriyat vakili Keri Leykning aytishicha, bu qaror «federal byurokratiyani qisqartirish» va «soliq to‘lovchilar manfaati» uchun amalga oshirilgan. Ayni paytda, muxoliflar bu qarorni Amerika ovozini jahondagi propagandaga qarshi muhim vosita sifatida yo‘q qilish deb baholashmoqda.

Ma’lumotlarga ko‘ra, ishdan bo‘shatilgan xodimlarning ayrimlari nafaqa yoshiga yetmagan va ularga kompensasiya puli to‘lanmasligi kutilmoqda. Bu holat USAGM ichki siyosatiga zid ekani aytilmoqda.

VOA ning Tramp ma’muriyatiga qarshi sudga bergan guruhi bayonot berib, Kongressni agentlikni ikki partiyali qo‘llab-quvvatlash an’anasini saqlab qolishga chaqirdi. Ularga ko‘ra, Moskva, Pekin va Tehron kabi davlatlar AQShga qarshi axborot hujumlarini kuchaytirayotgan bir paytda, Voice of America ni yopish AQShning global nufuziga zarba beradi.

1942 yilda nasistlar propagandasiga qarshi ta’sis etilgan Voice of America oxirgi yillarda ma’muriyat qarorlariga qarshi sud orqali kurashib kelayotgandi. Juma kungi keng ko‘lamli qisqartirish agentlik faoliyatiga hal qiluvchi zarba bo‘lishi mumkin.