O‘zbekistonga 8 oy ichida 7,5 million sayyoh tashrif buyurdi

Bu o‘tgan yilning shu davriga nisbatan qariyb 2,5 millionga yoki 49,1 foizga ko‘pdir.

Milliy statistika qo‘mitasi ma’lumotlariga ko‘ra, 2025 yilning yanvar-avgust oylarida O‘zbekistonga 7,5 million nafar xorijiy sayyoh tashrif buyurdi.

Eng ko‘p turistlar Qirg‘iziston, Qozog‘iston va Tojikistondan kelgan. Qirg‘izistondan kelgan sayyohlar soni 2,16 million nafarga yetdi, bu 48,9 foiz o‘sish demakdir. Qozog‘istondan 1,769 million kishi (+73,5 foiz), Tojikistondan esa 1,699 million nafar turist (+15,6 foiz) kelgan. Rossiyadan tashrif buyurganlar soni 25 foizga oshib, 663,2 ming nafarga yetdi.

Afg‘oniston sayyohlari birinchi marta yirik o‘nlikka kirib, 304,5 ming kishi bilan beshinchi o‘rinni egalladi. Turkmanistondan kelgan 243,5 ming mehmon esa oltinchi o‘rindan joy oldi. Ushbu ko‘rsatkich o‘tgan yilga nisbatan ikki barobardan ko‘p o‘sgan.

Uzoq xorijdan kelganlar orasida Xitoy yetakchi bo‘ldi — 135,4 ming sayyoh, bu bir yil avvalgiga nisbatan uch barobardan ko‘pdir. Turkiyadan kelganlar soni 113,1 ming nafarga yetgan bo‘lsa-da, reytingda sakkizinchi o‘ringa tushdi. Shuningdek, Hindistondan 42,2 ming, Janubiy Koreyadan esa 30 ming turist tashrif buyurgan.

Sayyohlarning katta qismi — 5,16 million kishi — qarindoshlarini yo‘qlash uchun kelgan. 1,15 million xorijlik dam olish va sayohat uchun, 837,5 ming nafar xizmat safari uchun, 287,7 ming kishi esa tijorat maqsadlarida keldi. Bundan tashqari, 62 ming kishi davolanish uchun, 14,2 ming nafar xorijiy talabalar esa ta’lim olish uchun O‘zbekistonga tashrif buyurdi.