O‘zbekiston–Qozog‘iston chegarasida fuqarolarni otvyortka bilan qo‘rqitib, pul undirgan shaxs ushlandi

Ijtimoiy tarmoqlarda Qozog‘iston va O‘zbekiston chegarasidagi «Qoplonbek» chegara punktida tasvirga olingan video tarqaldi. Noma’lum shaxs fuqarolarga otvyortka bilan tahdid qilib, ulardan pul talab qilayotgani xabar qilingan edi.

Turkiston viloyati polisiya departamenti xabariga ko‘ra, mazkur qonunbuzarlik holati yuzasidan jinoyat ishi qo‘zg‘atilgan.

Turkiston viloyatida yashovchi, doimiy yashash joyiga ega bo‘lmagan 43 yoshli ishsiz fuqaro jinoyat sodir etganlikda gumonlanib qo‘lga olindi, — deyiladi xabarda.

Hozirda gumonlanuvchi ushlanib, Turkiston viloyati IIB Sariag‘och tumani Polisiya boshqarmasining vaqtincha saqlash hibsxonasiga joylashtirildi. Tergov harakatlari olib borilmoqda.