O‘zbekiston Kasaba uyushmalari federasiyasi raisi “Crocus City Hall”da oilasi jabrlangan bolalar uchun dam olishni taklif qildi

FPU raisi Qudratilla Rafiqov “Crocus City Hall”dagi teraktda oilasi jabrlangan 100 nafar bola uchun Samarqand va Toshkentdagi sog‘lomlashtirish oromgohlariga sayohat tashkil etishni taklif qildi, deb xabar bermoqda «Podrobno.uz» muxbiri.

Bu haqda u Rossiya mustaqil kasaba uyushmalari federasiyasining XII qurultoyida ma’lum qildi.

Bolalar iyun oyida O‘zbekistonga 15 kunga kelishlari kutilmoqda. Ular eng yaxshi oromgohlarga joylashtirilib, Toshkent va Samarqandning diqqatga sazovor joylari ko‘rsatiladi.

O‘zbekiston Kasaba uyushmalari federasiyasi barcha xarajatlarni, jumladan, havo yo‘llari, O‘zbekiston ichida transfer, turar joy va boshqalarni qoplaydi.