O‘zbekiston ayollar terma jamoasi Jahon chempionatiga chiqish uchun kurashni davom ettiradi

O‘zbekiston ayollar terma jamoasi 2027-yilning iyun-iyul oylarida Braziliyada bo‘ladigan Jahon chempionati yo‘llanmasi uchun o‘tkazilgan pley-off uchrashuvida Filippin vakillariga 0:2 hisobida mag‘lub bo‘ldi. Ikkinchi bo‘lim boshida o‘tkazib yuborilgan ikki gol sababli jamoa kelasi yili Janubiy Amerika qit’asida bo‘lib o‘tadigan mundialga to‘g‘ridan-to‘g‘ri chiqish imkoniyatini qo‘ldan boy berdi. Filippin esa ushbu g‘alaba evaziga musobaqa yo‘llanmasini naqd qildi.

Kotrina Kulbite shogirdlari Osiyo Kubogi guruh bosqichida Xitoy va Shimoliy Koreyadan yirik mag‘lubiyatlar qabul qilgan bo‘lsalar-da, Bangladesh ustidan qozonilgan g‘alaba jamoani pley-off bosqichiga olib chiqqan edi. Chorak finalda Janubiy Koreyaga imkoniyat boy berilgach (0:6), jamoada hali to‘g‘ridan-to‘g‘ri yo‘llanma uchun qo‘shimcha imkoniyat saqlanib turgan edi. Biroq Filippindan uchralgan mag‘lubiyat bu yo‘lni yakunladi.

Endilikda O‘zbekiston ayollar terma jamoasini Jahon chempionati uchun qit’alararo pley-off bahslari kutmoqda. Bu jarayon ikki bosqichdan iborat bo‘ladi. Birinchi bosqich 2026-yilning noyabr-dekabr oylarida bo‘lib o‘tadi va unda turli qit’alardan kelgan 6 ta jamoa ishtirok etadi. Ulardan faqat ikkitasi keyingi bosqichga o‘tadi. 2027-yilning fevralida o‘tkaziladigan ikkinchi bosqichda esa jami 6 ta jamoa 3 ta yo‘llanma uchun kurashadi. O‘zbekiston terma jamoasi Braziliyadagi mundialga borishi uchun mana shu murakkab saralashdan o‘tishi talab etiladi.