Eronda Shvesiya fuqarosi qatl etildi

Shvesiya tashqi ishlar vaziri Mariya Malmer Stenergard Eronda Shvesiya fuqarosi qatl etilganini e’lon qildi.

Stenergardning so‘zlariga ko‘ra, erkak 2025 yil iyun oyida Eronda hibsga olingan. O‘shandan beri Shvesiya uni ozod qilishni bir necha bor talab qilgan. Qatl qilingan erkakning ismi va jazo sabablari oshkor qilinmagan.

Shvesiya tashqi ishlar vaziri shuningdek, Stokgolmdagi Eron elchisini norozilik bildirish uchun chaqirganini e’lon qildi.

«O‘lim jazosi g‘ayriinsoniy va shafqatsiz jazo bo‘lib, uni qaytarib bo‘lmaydi. Shvesiya, boshqa Yevropa Ittifoqi mamlakatlari singari, uning har qanday holatda qo‘llanilishini qoralaydi», deb ta’kidladi u.«Shvesiya fuqarosining qatl etilishiga olib kelgan sud jarayoni qonuniy jihatdan bahssiz emasligi biz uchun mutlaqo aniq. Buning uchun to‘liq javobgarlik Eron zimmasida», deyiladi bayonotda.

Eronda urush boshlanishi arafasida Shvesiya, boshqa bir qator davlatlar singari, o‘z fuqarolarini mamlakatni tark etishga chaqirgandi.