"O‘rgamchak to‘ri" operasiyasidan keyin Rossiya eng qimmat samolyotlarini Ukrainadan uzoqlashtirmoqda

Ukraina dronlari Rossiya aerodromlariga hujum qilganidan so‘ng, Rossiya o‘zining eng qimmatli harbiy samolyotlarini Ukrainadan uzoqlashtirdi.

The Telegraph nashri xabar berishicha, ikkita Tu-160 strategik bombardimonchi samolyoti front chizig‘idan 6 ming km uzoqlikda joylashgan olis "Anadir" aviabazasiga ko‘chirildi.

Nashrning qayd etishicha, aerodrom Alyaskadan taxminan 660 km uzoqlikda, aholi yashamaydigan Chukotka yarim orolida joylashgan. U Sovuq urush davrida Rossiyani Qo‘shma Shtatlar tomonidan ehtimoliy hujumlardan himoya qilish uchun yaratilgan.

"Supersonik Tu-160 bombardimonchi samolyotlari yadroviy qurolni olib yurishi mumkin va Rossiya arsenalidagi eng qimmat hisoblanadi. Bir birlik narxi taxminan 500 million dollarni tashkil qiladi. Taqqoslash uchun, Amerika bombardimonchi flotining tayanchi bo‘lgan B-52 Stratofortress taxminan 94 million dollarga baholanadi", deb ta’kidlaydi mualliflar.

Xabar qilinishicha, Rossiyada jami 16 ta shunday samolyot bor. Biroq Ukraina ushbu Tu-160 samolyotlarining bir qismi "O‘rgimchak to‘ri" operasiyasi doirasida 1 iyundagi hujum paytida zarar ko‘rganini aytdi.