Ukraina Tatarstondagi «Shahed» dronlari omboriga zarba berganini ma’lum qildi

Ukraina Xavfsizlik xizmati (SBU) 10 avgust kuni tongda Tatarstonda joylashgan zarba dronlari — «Shahed» saqlanadigan omborga zarba berilganini ma’lum qildi. Ma’lumotlarga ko‘ra, zarba Yelabuga shahriga yaqin (takriban 30 km) joylashgan Qizil-Yul posyolkasining logistika xabiga yo‘naltirilgan. Hujum natijasida binoda yong‘in kelib chiqqan.

Rossiya Mudofaa vazirligi bu hujum bo‘yicha shu kuni tongda ma’lumot berib, Tatarston osmonida uchta dron yo‘q qilinganini aytgan. Respublika rasmiylari esa To‘qay tumanidagi qurilish maydonida uchta dron parchalari topilganini ma’lum qildi. Aynan shu hududda Qizil-Yul joylashgan. Hujumda jabrlanganlar haqida xabar yo‘q.

📍 Rossiya-Ukraina chegarasi bilan Tatarston o‘rtasidagi masofa taxminan 1300 kmni tashkil qiladi.