Ukraina ittifoqchilaridan qurol-yarog‘ uchun yana 20 milliard dollar so‘raydi

Bu haqda Politico xabar berdi.

Kiyev jang maydonida Rossiya ustidan qozonilgan vaqtinchalik g‘alabani mustahkamlash" uchun ittifoqchilaridan qurol-yarog‘ga yana 20 milliard dollar ajratishni so‘raydi, aks holda "imkoniyatlar oynasi tez orada yopiladi", hatto "halokat" yuz berishi ham mumkin. Bu haqda Ukrainaning yuqori martabali mulozimlari anonim tarzda Politico nashriga ma’lum qilgan.

"Rossiya yonayotganini hamma ko‘rib turibdi va biz u yanada kuchliroq yonishini xohlaymiz, lekin buning uchun bizga moliyaviy ko‘mak kerak", — dedi Mudofaa vazirligi vakili.

Kiyev o‘z so‘rovini 18 iyun FQB kuni bo‘lib o‘tadigan navbatdagi "Ramshtayn" uchrashuvida e’lon qiladi. Ushbu masalani Fyodorov bir qator davlatlardagi hamkasblari bilan allaqachon muhokama qilgan. Ko‘zlangan 20 milliard dollarlik ko‘rsatkichga erishish uchun ittifoqchilarning har biriga 2 dan 6 milliard dollargacha mablag‘ ajratish taklif etiladi: Bu yordam yoki kredit bo‘lishi mumkin.

Ukrainaning yuqori martabali mulozimi Kiyev hozirgi vaqtni Rossiyaga harbiy bosimni kuchaytirish va tinchlik muzokaralarini o‘tkazish uchun qulay, ammo vaqt jihatidan cheklangan fursat deb hisoblashini aytdi.

"Imkoniyatlar oynasi tez orada yopiladi. Rossiya tez va innovasion tarzda harakat qilmoqda. Agar biz unga yana moslashish uchun vaqt bersak, ushbu urushni haqiqiy muzokaralar orqali tugatishning yagona real imkoniyatini qo‘ldan boy berishimiz mumkin. Agar Moskva o‘zining o‘rta masofaga uchuvchi dronlarini yaratsa, bu biz uchun halokat bo‘ladi", — deya ta’kidladi mulozim.