Ukraina Finlyandiyaga portlovchi moddalar ortilgan dronlarni tasodifan yuborgan bo‘lishi mumkin

Finlyandiyaning Helsingin Sanomat nashri manbalariga tayanib xabar berishicha, Ukraina tomonidan uchirilgan portlovchi moddalar ortilgan dronlar texnik nosozlik sababli tasodifan Finlyandiya tomon yo‘nalgan bo‘lishi mumkin.

Nashr ma’lumotiga ko‘ra, Kiyevning o‘zi Xelsinkini dronlar adashib Finlyandiya tomon yo‘nalgani haqida ogohlantirgan. Shu munosabat bilan Finlyandiya rasmiylari chegara hududlarida yashovchi aholini ehtimoliy xavf haqida xabardor qilgan, biroq tahdidning aniq mohiyati ochiqlanmagan.

Keyinroq Finlyandiya harbiylari dronlar mamlakat tomon Rossiya hududidan yaqinlashganini ma’lum qildi. Gazeta ta’kidlashicha, bu holat tahdid Rossiyaning Ukrainaga qarshi harakatlari bilan bog‘liq degan tasavvur uyg‘otishi mumkin edi.

Nashrning yozishicha, hujum dronlari odatda nishon koordinatalari bo‘yicha dasturlanadi, ammo texnik nosozliklar tufayli belgilangan yo‘nalishdan chiqib ketishi mumkin. Finlyandiya harbiylari dronlar mamlakat havo hududiga kirmaganini bildirgan. Shu bilan birga, gazeta ular yo‘lda Rossiya havo mudofaa tizimlari tomonidan urib tushirilgan bo‘lishi mumkinligini ham istisno qilmaydi.