Turkiyalik fuqaro insultdan so‘ng ona tilini unutib, daniyacha gapira boshladi

Turkiyaning Konya shahrida istiqomat qiluvchi 67 yoshli Rahmi Karademir insult oqibatida tibbiy muolajadan keyin, kutilmaganda ko‘p yillar mobaynida ishlatmagan dan tilida so‘zlasha boshladi. Bu voqea haqida Anadolu axborot agentligi xabar bermoqda.

Etti farzandning otasi bo‘lmish Karademir 20 yil Daniyada yashagan, so‘ngra Turkiyaga qaytib, taxminan 10 yil oldin Konyaga o‘rnashgan. O‘tgan hafta u tizzasidan jarrohlik amaliyotini o‘tkazdi. Amaliyotdan ikki kun o‘tgach, uning o‘ng qo‘li va oyog‘i to‘satdan holsizlandi, nutqida ham buzilishlar yuzaga keldi. Shoshilinch tashxis qo‘yilganda, uning miyasining chap qismidagi yirik arteriyalardan biri tromb bilan tiqilib qolgani aniqlandi. Shifokorlar zudlik bilan angiografiya o‘tkazib, trombni olib tashlashdi. Muolajadan so‘ng asosiy nevrologik belgilar tez orada barham topdi. Biroq, Karademir uzoq vaqtdan beri foydalanmagan dan tilida gapira boshladi. Bu hol uning xotini va qarindoshlari uchun mutlaqo kutilmagan voqea bo‘ldi. Turk tilida so‘zlasha olmagani uchun Karademir kuchli ruhiy bosimni boshdan kechirdi.

Trombektomiyani amalga oshirgan Selchuk universiteti klinikasi nevrologiya kafedrasi mudiri, professor Gekxan O‘zdemir agentlikka xabar berishicha, operasiyadan so‘ng shifokorlar g‘alati hodisaga duch kelishgan: "Bemorning endi turk tilida gapira olmasligi, lekin dan tilida erkin so‘zlashini aniqladik. Tibbiy adabiyotlarda bir necha tilni biladigan odamlarda insult oqibatida bir tilni yo‘qotib, boshqa tilning kutilmaganda faollashishi kabi kamdan-kam uchraydigan holatlar tasvirlangan. Insultdan keyin hech bo‘lmaganda bitta tilda gapira olish keyingi tiklash jarayoni uchun muhim ustunlikdir." U yana qo‘shimcha qilishicha, kelajakda turk tilida so‘zlash qobiliyati tiklanishi kutilmoqda va bu tegishli davolash usullari yordamida erishish mumkin bo‘lgan natija hisoblanadi.

Bemorning qizi Meral Karademir otasining ko‘p yillardan beri daniyacha gapirmaganini aytdi: "U daniyacha gapira boshlaganida, hayratda qoldik. Yaxshiyamki, singillarim bu tilni bilishadi va u bilan suhbatlasha olishadi. U turkchani tushunadi, lekin gapira olmaydi. Ona tilini yo‘qotib qo‘yganini o‘ylab, juda xafa bo‘lyapti."

Rahmi Karademirning o‘zi shunday dedi: "Turkchani tushunaman, ammo gapira olmayman. So‘zlarni eslab qolishga urinaman, xotiramni zo‘riqtiraman. Umid qilamanki, bu holat tezda o‘tib ketadi. Daniya tili miyamda bor, turk tili esa xotiramga umuman kelmayapti."