Turkiyada zo‘ravonlikka uchragan 17 yoshli o‘zbekistonlik vatanga qaytarildi

Turkiyada zo‘ravonlikka uchragan 17 yoshli O‘zbekiston fuqarosi vatanga qaytarildi. Bu haqda Migrasiya agentligi xabar berdi.

Ma’lum qilinishicha, voyaga yetmagan fuqaro o‘qish bahonasida Turkiyaga olib borilgan. U yerda majburiy nikohga undash, jismoniy zo‘ravonlik va majburiy mehnat holatlariga duch kelgan.

Fuqaro ushbu holatlar yuzasidan O‘zbekistonning Istanbuldagi Bosh konsulxonasiga murojaat qilgan.

Bosh konsulxona tomonidan advokatlar jalb qilinib, unga konsullik-huquqiy yordam ko‘rsatilgan. Shuningdek, fuqaroning Migrasiya jamg‘armasi mablag‘lari hisobidan O‘zbekistonga qaytarilishi ta’minlangan.

Migrasiya agentligi ma’lumotiga ko‘ra, voyaga yetmagan fuqaroning xavfsizligini, ijtimoiy-huquqiy va psixologik himoyasini ta’minlash masalalari tegishli tashkilotlar tomonidan nazoratga olingan.