Turkiy davlatlar tashkiloti bosh kotibi: "Qirg‘iziston-O‘zbekiston-Tojikiston kelishuvi tarixiy muhim voqea"

Qirg‘iziston-O‘zbekiston-Tojikiston kelishuvi mintaqaviy hamkorlikni mustahkamlash va tarixiy ahamiyati jihatidan muhim voqeadir.

Bu fikrlar Turkiy davlatlar tashkiloti (TDT) bosh kotibi Kubanichbek O‘muraliyevning bayonotida keltirilgan.

Tashkilot bosh kotibining bayonoti bugun Xo‘jandda bo‘lib o‘tgan Qirg‘iziston, O‘zbekiston va Tojikiston davlat rahbarlarining uch tomonlama sammiti hamda ushbu davlatlarning davlat chegaralarini tutashtirish to‘g‘risidagi bitim imzolanishi munosabati bilan aytildi.

Ta’kidlanishicha, birinchi uch tomonlama sammit mintaqaviy hamkorlikni mustahkamlash, Markaziy Osiyoda barqarorlik va farovonlikka ko‘maklashishda burilish nuqtasi bo‘ldi.

O‘muraliyev, shuningdek, Qirg‘iziston, O‘zbekiston va Tojikiston respublikalari davlat chegaralarining tutashuvi to‘g‘risidagi tarixiy Bitimning imzolanishi davlat rahbarlarining ochiq muloqot va konstruktiv hamkorlik masalasida ko‘rsatgan qat’iyati ramzi ekanini ta’kidladi: “Bu qadamlar ham murakkab masalalarni diplomatiya va o‘zaro tushunish yo‘li bilan hal etishning muhim namunasidir”.

TDT Bosh kotibi uch qardosh davlatning mintaqaviy sheriklikni chuqurlashtirish, umumiy tinchlik, xavfsizlik va iqtisodiy taraqqiyotga ko‘maklashish borasidagi qat’iyatini yuqori baholadi va TDT turkiy davlatlar va qo‘shni davlatlar o‘rtasidagi birlik va hamkorlikni mustahkamlashga qaratilgan tashabbuslarni bundan buyon ham qo‘llab-quvvatlashini ta’kidladi.