Rossiya Tu-22 strategik raketa tashuvchi samolyotlarini yo‘qotmoqda

Ukrainaga qarshi keng qamrovli urush davomida Rossiya o‘zining Tu-22M strategik raketa tashuvchi samolyotlari parkining deyarli 10 foizini yo‘qotdi.

Forbes jurnali kechagi kungi ulardan birining halokati tahlilini o‘tkazib, shu haqda yozmoqda.

Ukrainadagi urushdan oldin Rossiyada 60 ga yaqin Tu-22M mavjud edi - bular Sovuq urush davridagi bombardimonchi samolyotlarning yangilangan versiyalari bo‘lib, turli xil qanotli raketalarni tashiy oladi. Kechagi falokatgacha Rossiya harbiy-havo kuchlari allaqachon bunday to‘rtta samolyotni yo‘qotgan edi - bittasi qulab tushdi, bittasi urib tushirildi va yana ikkitasi Ukraina dronlarining aerodromga hujumi natijasida yo‘q qilindi yoki kamida jiddiy shikastlandi.

Bundan tashqari, yanvardan martgacha bo‘lgan davrda Engels aviabazasiga bir qator dron hujumlari bu bombardimonchilar uchirgan qanotli raketalarning ulkan zaxirasini yo‘q qildi. Forbes yo‘qotilgan raketalarning qiymatini deyarli 1 milliard dollarga baholamoqda.

Tu-22M samolyotlari Ukrainaga xavfsiz masofadan raketa uchirayotgan bo‘lsa-da, ularning har bir parvozi ma’lum xatarlarni o‘z ichiga olishini nashr muallifi ta’kidlaydi. Chunki bu 1960 yillarda loyihalangan va 1970-80 yillarda qurilgan samolyotlar haqida gap ketmoqda. X-22 raketalari ham, hozirgi kunda ishlab chiqarilayotgan bo‘lsa-da, 1960 yillarda loyihalangan.

"Taxminan 4 tonna gipergol yoqilg‘isi bo‘lgan qadimiy raketa bilan parvoz qilishdan qiziqarliroq narsa yo‘q," - deb hazillashdi aviasiya bo‘yicha mutaxassis Bill Svitman.

Shu bilan birga, Forbes uch yildan ortiq davom etgan keng miqyosli urushda beshta Tu-22M yo‘qotilishi uning borishiga hech qanday ta’sir ko‘rsatmasligini tan oladi: rossiyaliklar yaqin kelajakda Ukrainani bombardimon qilish uchun yetarli miqdorda omon qolgan Tu-22M va Tu-95 hamda Tu-160 kabi boshqa turdagi bombardimonchi samolyotlarga ega.

Kecha Rossiyada Tu-22M3 strategik raketa tashuvchi bombardimonchi samolyoti halokatga uchradi.