AQSh hukumati xodimlariga xitoyliklar bilan ishqiy munosabatlar o‘rnatishni taqiqladi

AQSh hukumati Xitoydagi o‘z davlat xizmatchilariga Xitoy fuqarolari bilan ishqiy munosabatlar va jinsiy aloqalar o‘rnatishni man etdi. Bu haqda vaziyatdan xabardor manbalarga asoslanib, Associated Press xabar bermoqda.

Taqiq davlat sirlariga kirish huquqiga ega bo‘lgan xizmatchilar va ularning oila a’zolariga tegishlidir.

Qaror 2025 yil yanvarida AQShning Xitoydagi elchisi Nikolas Byornsning iste’foga chiqishi arafasida qabul qilingan. Taqiq AQShning materik Xitoydagi barcha diplomatik vakolatxonalarini, jumladan Pekindagi elchixona hamda Guanchjou, Shanxay, Shenyan va Uxandagi konsulliklarni, shuningdek Gonkongdagi konsullikni qamrab oladi. Allaqachon munosabatlari mavjud bo‘lgan xodimlar bundan mustasno - ular taqiqdan ozod etilish uchun so‘rov yuborishlari mumkin. Rad etilgan taqdirda, ular yo munosabatlarini to‘xtatishlari, yo lavozimlarini tark etishlari lozim bo‘ladi.

Kongress a’zolari avvalgi cheklovlarning yetarlicha qat’iy emasligidan tashvish bildirganidan so‘ng bu choralar joriy etildi. 2024 yil iyulda AQSh elchixonasi va Xitoydagi beshta konsullikda qo‘riqchi va boshqa yordamchi xodim sifatida ishlaydigan xitoyliklar bilan munosabatlarni yanada qattiqroq cheklash qabul qilingan edi. Biroq Byorns buni Xitoy fuqarolari bilan har qanday aloqani butunlay taqiqlashgacha kengaytirdi. Qoidalarning qat’iylashtirilishiga Xitoy maxsus xizmatlarining faollashuvi sabab bo‘ldi. Razvedka manbalariga ko‘ra, Xitoy hokimiyati maxfiy ma’lumotlarni qo‘lga kiritish uchun "asal tuzoq" taktikasidan faol foydalanmoqda. Xitoydagi amerikalik diplomatlar bunday yollash urinishlariga qarshi kurashish uchun maxsus tayyorgarlikdan o‘tmoqda.

Davlat departamenti ichki ko‘rsatmalarga izoh berishdan bosh tortdi, Milliy xavfsizlik kengashi esa savollarni Davlat departamentiga yo‘naltirdi. Xitoy Tashqi ishlar vazirligi ham yangi taqiq haqida aniq fikr bildirmadi.