Ukraina harbiylar yetishmasligi muammosini qisman hal qildi

AQShning Yevropadagi kuchlari qo‘mondoni Ukraina harbiylar yetishmasligi muammosini qisman hal qilganini ma’lum qildi.

"Ukraina Rossiyaga qarshi kurashayotgan askarlar soni yetishmovchiligi muammosining bir qismini hal qildi. Xususan, bu holat xizmatga yangi chaqiruvchilar sonini oshirish hisobiga amalga oshirildi", – deya general Kristofer Kavolining so‘zlarini keltirdi Reuters.

Bundan tashqari, general AQSh tomonidan Ukrainaga qurol-yarog‘ va razvedka ma’lumotlarini yetkazib berishning to‘xtatilishi Kiyev uchun jiddiy oqibatlarga olib kelishini aytdi. Kavolining so‘zlariga ko‘ra, Ukraina qurol yetkazib beruvchi davlatlar ro‘yxatini kengaytirishga harakat qilganiga qaramay, Qo‘shma Shtatlar yordamining yo‘qolishi jang maydonida ukrain qo‘shinlarining holatiga jiddiy ta’sir ko‘rsatadi.

Kavolining qayd etishicha, Rossiya o‘z qo‘shinlari sonini oshirmoqda va yo‘qotishlarini tahlilchilar kutgandan tezroq tiklamoqda.