Trampning Ukraina bo‘yicha maxsus vakili Kit Kellog urushni tugatish bo‘yicha muzokaralarda ishtirok etishdan chetlashtirildi — Politico

Nashrning yozishicha, hozir muzokaralar jarayonida AQSh tomonidan asosiy rollarni davlat kotibi Marko Rubio va Yaqin Sharq bo‘yicha maxsus vakil Stiv Uitkoff bajarmoqda. Kellog fevral va mart oylarida Saudiya Arabistonida bo‘lib o‘tgan uchrashuvlarda qatnashmagan. AQSh rasmiylari bu uchrashuvlarda Rossiya va Ukraina delegasiyalari bilan muzokaralar olib borgan. Fevral oyida Kellog Kiyevga tashrif buyurgan edi.

Tramp ma’muriyati vakilining NatSec Daily nashriga ma’lum qilishicha, Kellogning Ukraina bo‘yicha muzokaralardagi roli "katta savol ostida", ammo prezident bu borada hali yakuniy qarorni qabul qilmagan. Shu bilan birga, ma’muriyatning boshqa amaldorlari bu fikrga qo‘shilmay, Kellogni "jamoaning qimmatli a’zosi" deb atashmoqda.

Politico bilan suhbatlashgan manbalar Kellogning muzokaralarda ishtirok etmayotganini AQSh ma’muriyatining Ukrainaga ko‘rsatilayotgan yordamni davom ettirishga shubha bilan qarayotgan qismi ta’sirining kuchayishi sifatida baholamoqda. Kellogga yaqin manbaga ko‘ra, maxsus elchi Tramp bilan to‘g‘ridan-to‘g‘ri muloqotni davom ettirmoqda. Uning o‘zi esa Uitkoff bilan yaqin hamkorlik qilayotganini ta’kidlagan.