Trampning bayonotidan so‘ng neft narxi keskin pastladi — Bloomberg tahlili

AQSh prezidenti Donald Tramp Rossiyaga qarshi ikkinchi darajali sanksiyalar joriy etish niyatini e’lon qilganidan so‘ng, neft bozorida keskin narx tushishi kuzatildi. Biroq bu reja Rossiya neft eksportini to‘xtatish choralarini qamrab olmagani sababli, bozor ishtirokchilarida umidsizlik kayfiyati hukm sura boshladi.

Bloomberg nashrining yozishicha, West Texas Intermediate (WTI) neftining narxi 2,1 foizga pasayib, barreli 67 dollardan pastga tushdi. Ushbu tushishga Trampning «50 kun ichida urush to‘xtamasa, Rossiya bilan savdo qiluvchi davlatlarga 100 foizlik bojlar qo‘llaniladi», degan tahdidi sabab bo‘ldi. Biroq u Rossiya nefti eksportiga bevosita cheklovlar haqida gapirmadi, bu esa treyderlar kutayotgan asosiy qadamlardan biri edi.

Rabobank kompaniyasi energetika bo‘yicha mutaxassisi Jo DeLauraga ko‘ra, bunday «ikkilamchi bojlar»ni amalga oshirish oson emas va sarmoyadorlar bu tashabbusga ishonmayapti. Uning ta’kidlashicha, faqatgina Rossiya neft sanoatiga bevosita AQSh sanksiyalari qo‘llanilsa, neft narxi yuqorilashi mumkin edi.

Bloomberg Trampning Yevropa Ittifoqi va Meksika mahsulotlariga 30 foizlik boj joriy etish tahdidlari tufayli ham energiya resurslariga bo‘lgan talab bo‘yicha istiqbollar buzilganini ta’kidlaydi. Bu g‘arb davlatlari va Xitoy o‘rtasidagi savdo qarama-qarshiligi yanada avj olishini anglatadi.

Shu bilan birga, OPEC+ mamlakatlari qazib olish cheklovlarini asta-sekin yumshatmoqda. Bu ikkinchi yarim yillikda neft taklifining ortib ketishiga olib kelishi mumkin. Shu sababli, neft narxi yil boshiga nisbatan 6 foiz arzonlashgan holda qolmoqda.

Investorlar hozirda AQShda e’lon qilinishi kutilayotgan inflyasiya ko‘rsatkichlariga diqqat qaratmoqda. Bu ko‘rsatkichlar AQShning pul-kredit siyosati kelajagi bo‘yicha muhim signallarni berishi mumkin.