Tramp Zelenskiy bilan kelishmovchilikdan so‘ng nimani rejalashtirmoqda?

AQSh prezidenti Donald Tramp Ukrainadagi urushni tugatish uchun harakat qilishdan voz kechmaydi, ammo kelishmovchilikdan so‘ng ehtimol Kiyevga bosimni kuchaytiradi va Ukraina rahbari Vladimir Zelenskiy bilan to‘g‘ridan-to‘g‘ri muloqotdan qochadi, deb taxmin qilmoqda Bloomberg.

"Evropa birgalikda vaziyatni tiklashga harakat qiladi, ammo Tramp Ukrainani sotishga qaror qilganga o‘xshaydi," - dedi Yevropalik amaldor nomi oshkor qilinmaslik sharti bilan Bloomberga. Boshqa bir nechta Yevropalik amaldorlar Oval kabinetdagi muvaffaqiyatsizlikni tuzoq deb baholashdi.

AQSh davlat kotibi Marko Rubioning aytishicha, Oq uydagi kelishmovchilikka Zelenskiyning AQSh vitse-prezidenti Jey Di Vensga qarata aytgan "Sen qanday diplomatiya haqida gapiryapsan, Jey Di?" degan so‘zlari sabab bo‘lgan.

"Suhbat Zelenskiy vitse-prezident Vensga murojaat qilib, Rossiya prezidenti Vladimir Putin bilan muloqot tajribasi haqida gapira boshlaganda qizishdi. AQShning tinchlik o‘rnatish borasidagi sa’y-harakatlarini bunday ochiqchasiga va faol ravishda barbod qilish juda tashvishli edi," - deya izoh berdi AQSh davlat kotibi CNN telekanaliga bergan suhbatida.

Britaniyaning The Times nashri esa ta’kidlashicha, Oval kabinetdagi so‘z talashuvlar "dahshatli geosiyosiy ssenariylarni voqelikka yaqinlashtirdi."

"Amerikaliklarning Yevropadan chiqib ketishi, NATOning tarqalib ketishi, hatto Vashington bilan Moskva o‘rtasidagi mafkuraviy yaqinlikning an’anaviy ittifoqchilaridan ham zichroq bo‘lishi - bular yaqin kelajakdagi istiqbollardir.

Bu Oq uydagi ataylab uyushtirilgan tuzoq bo‘lganmi yoki Zelenskiy jahldor prezidentga nisbatan yomon munosabatda bo‘lganmi, bu aniq vaziyatda ahamiyatsiz. Prezident Tramp bunday itoatsizlikni jazosiz qoldiradigan odam emas. U Ukrainaga harbiy yordam ko‘rsatishni to‘xtatib qo‘yishi xavfi mavjud.

Shu bilan birga, Yevropa ijtimoiy tarmoqlardagi qo‘llab-quvvatlovchi postlardan tashqari qanchalik uzoqqa bora olishi hali aniq emas: AQSh ko‘magisiz xavfsizlikni ta’minlash uchun Yevropaga kamida 300 ming askar va mudofaa uchun yiliga 200 milliard funt sterlingdan ortiq mablag‘ kerak bo‘lishini hisobga olsak, Yevrokomissiya amaldorlaridan biri "Ukraina biz uchun muhim, lekin butunlay emas," deb tan oldi, deb yozadi nashr.