Tramp Yaponiya parlament saylovlari oldidan Bosh vazir Takaitini qo‘llab-quvvatladi

AQSh prezidenti Donald Tramp Yaponiya parlament saylovlari oldidan amaldagi Bosh vazir Sanae Takaitini qo‘llab-quvvatlashini bildirdi.

Tramp bu haqda Truth Social ijtimoiy tarmog‘ida tegishli post qoldirdi.

"Buyuk Yaponiya xalqi 2026 yil 8 fevral, yakshanba kuni juda muhim parlament saylovlarini o‘tkazadi. Bosh vazir Sanae Takaiti o‘zini kuchli, ta’sirchan va dono rahbar sifatida isbotladi, u o‘z mamlakatini chinakam sevadi. Takaiti o‘zi va uning koalisiyasi qilayotgan ishlari uchun ulkan e’tirofga loyiq inson va shuning uchun Qo‘shma Shtatlar prezidenti sifatida men uni va uning juda hurmatga sazovor koalisiyasi nimani ifodalashini to‘liq va to‘liq qo‘llab-quvvatlashimni bildirishdan faxrlanaman. U Yaponiya xalqini tushkunlikka tushirmaydi!”, deb yozgan Tramp.

Amerika yetakchisi shuningdek, Takaitining 19 martga rejalashtirilgan Oq uyga tashrifini intiqlik bilan kutayotganini qo‘shimcha qildi. "Yaponiyaga tashrifim davomida men va barcha vakillarim juda ta’sirlandik. Milliy xavfsizlik masalalaridan tashqari, Qo‘shma Shtatlar va Yaponiya ikkala mamlakat uchun ham juda foydali bo‘lgan juda muhim savdo shartnomasini tuzish uchun yaqindan hamkorlik qildi”, deb ta’kidladi u.