Tramp Rossiyaga nisbatan yana bir sanksiyalarni joriy qilmoqchi

Donald Tramp ma’muriyati, agar Rossiya prezidenti Vladimir Putin juma kuniga qadar Ukrainadagi jangovar harakatlarni to‘xtatishga rozi bo‘lmasa, rus tankerlarining soya flotiga qarshi yangi sanksiyalar qo‘llash masalasini ko‘rib chiqmoqda.

Bu haqda Oq uydagi ichki muhokamalardan xabardor manbalarga tayanib, Financial Times nashri xabar berdi.

Bu yanvar oyida Tramp hokimiyatga qaytganidan beri AQShning Rossiyaga qarshi sanksiyalarini birinchi marta kengaytirishi. Xususan, G‘arbning neft eksportiga qo‘ygan cheklovlarini chetlab o‘tish uchun Moskva qo‘llagan kemalarning qora ro‘yxati muhokama qilinmoqda.

Kpler tahliliy ma’lumotlariga ko‘ra, ro‘yxatga 115 ta tanker qo‘shilgandan so‘ng, ular tashilgan Rossiya nefti hajmi deyarli to‘rt baravar kamaygan - oyiga 48 million barreldan 13 million barrelgacha.

Rasmiylarga ko‘ra, sanksiyalar Trampning Putinning o‘t ochishni to‘xtatishga rozilik berishdan bosh tortganidan g‘azabi kuchaygani sababli ko‘rib chiqilmoqda. Shu hafta boshida AQSh prezidenti Ukraina prezidenti Vladimir Zelenskiy bilan telefon orqali keyingi qadamlarni muhokama qildi. "Biz Rossiyaga qarshi sanksiyalar haqida gaplashdik. Ularning iqtisodiyoti pasayib bormoqda, shuning uchun ham ular bu tahdidlarga jiddiy e’tibor qaratmoqda", - dedi Zelenskiy.

Bundan tashqari, Tramp ma’muriyati Rossiya neftining asosiy xaridorlaridan biri bo‘lgan Hindiston tovarlariga tariflar oshirilishini e’lon qildi. “Rossiya harbiy mashinasi qancha ukrainalikni o‘ldirishi ularga ahamiyat bermaydi”, — deb yozdi Tramp ijtimoiy tarmoqda.

Prezidentning maxsus vakili Stiv Uitkoff muzokaralar uchun shu hafta Moskvaga kelishi kerak. Yangi cheklovlar bo‘yicha qaror uning qaytib kelganidan keyin qabul qilinadi. "Agar u hech narsasiz qaysa, Tramp portlab ketadi", dedi FT manbasi.

Ko‘rib chiqilayotgan boshqa chora-tadbirlar qatorida amaldagi sanksiyalar ustidan nazorat darajasini oshirish; Yevropa Ittifoqining rus neftiga yangi "suzuvchi" narx chegarasiga qo‘shilish; Rossiya bilan savdoni qo‘llab-quvvatlovchi uchinchi mamlakatlardagi banklar va neftni qayta ishlash zavodlariga qarshi ikkilamchi sanksiyalarni joriy etish. Shuningdek, senatorlar Lindsi Grem va Richard Blumentalning Rossiyadan energiya sotib olishda davom etayotgan mamlakatlarga 500 foizgacha tariflar joriy etishni nazarda tutgan ikki partiyaviy qonun loyihasi ham qo‘llab-quvvatlanmoqda. Tramp qonun loyihasini qo‘llab-quvvatlash haqida jiddiy o‘ylayotganini aytdi.