Tramp qo‘llab-quvvatlayotgan braziliyaning sobiq prezidenti uy qamog‘iga hukm qilindi

Braziliya Oliy sudi davlat to‘ntarishiga uringanlikda ayblanib sudlanayotgan sobiq prezident Jair Bolsonaroni uy qamog‘iga olish haqida qaror chiqardi.

Qaror sobiq siyosatchining ijtimoiy tarmoqlardan foydalanishga qo‘yilgan taqiqni buzgani munosabati bilan qabul qilingan.

Sudya Aleshandre de Morayes qarorida Bolsonaro o‘z tarafdorlari, jumladan parlament a’zosi bo‘lgan o‘g‘illarining ijtimoiy tarmoqlaridan Oliy sudga hujumlar va Braziliya sud tizimiga xorijiy aralashuvga chaqiruvchi xabarlarni tarqatish uchun foydalanganini ta’kidladi.

Yakshanba kuni Braziliyaning turli shaharlarida sobiq prezidentni qo‘llab-quvvatlovchi mitinglar bo‘lib o‘tdi. Uning o‘g‘illaridan biri Flavio Rio-de-Janeyrodagi olomonga murojaat qilish uchun miting paytida otasini qisqa vaqtga dinamik telefonga qo‘ydi. Keyinroq u otasining tarafdorlariga murojaati aks etgan videoni ham joylashtirdi. Keyinchalik post o‘chirildi.

"O‘rnatilgan cheklovlarga qo‘pol ravishda e’tibor bermaslik shunchalik aniq ediki, takror aytamiz, sudlanuvchining o‘g‘li, senator Flavio Nantes Bolsonaro qonun buzilishini yashirish uchun o‘zining "Instagram" sahifasidan postni o‘chirishga qaror qildi", deb yozdi Morayes.

Oliy sud, shuningdek, Bolsonaroga advokatlar yoki sud tomonidan tasdiqlangan shaxslardan tashqari tashrif buyuruvchilarni qabul qilishni va mobil telefondan foydalanishni taqiqladi. Avvalroq sobiq prezidentga elektron bilaguzuk taqish, komendantlik soatiga rioya qilish, ijtimoiy tarmoqlardan foydalanmaslik va o‘g‘li Eduardo Bolsonaro bilan bog‘lanmaslik buyurilgan edi, u AQShda uni qo‘llab-quvvatlaydi va prezident Donald Trampga yaqin bo‘lishi mumkin.

Bolsonaro 2022 yilgi prezidentlik saylovlari natijalarini bekor qilish uchun til biriktirganlikda ayblanib sudlanmoqda. Agar Bolsonaro aybdor deb topilsa, 40 yilgacha ozodlikdan mahrum etilishi mumkin. Sobiq prezident o‘z aybini tan olmaydi.

Tramp Bolsonaro ustidan sud jarayonini keskin qoralab, Braziliya rasmiylarini "jodugar ovi"da ayblab, sudya Aleshandre de Morayesga nisbatan sanksiyalar qo‘llagan.