Tramp NATOga AQSh sarflayotgan mablag‘lardan norozi ekanini bildirdi

AQSh prezidenti Donald Tramp mamlakatning NATO mudofaasi uchun boshqa barcha a’zo davlatlarga qaraganda ancha ko‘p mablag‘ sarflayotgani, ammo bundan yetarli foyda ko‘rmayotganini ma’lum qildi.

Truth Social ijtimoiy tarmog‘ida yozgan xabarida Tramp shunday dedi:

«Qo‘shma Shtatlar NATOni himoya qilish uchun boshqa har qanday davlatga qaraganda ancha ko‘p mablag‘ sarflaydi, ammo hech qanday foyda ko‘rmaydi».

Tramp keltirgan raqamlarga ko‘ra, NATO mudofaasiga ajratilgan mablag‘lar quyidagicha:

• AQSh — 999 milliard dollar;
• Buyuk Britaniya — 90,5 milliard dollar;
• Fransiya — 66,5 milliard dollar;
• Italiya — 48,8 milliard dollar;
• Polsha — 44,3 milliard dollar.

Uning ta’kidlashicha, boshqa davlatlar, jumladan Germaniya, 2014–2025 yillar davomida ancha kam mablag‘ sarflagan.

«Bu bema’nilik!» — deya xulosa qildi Tramp.