Tramp: "Medvedevning bayonotlaridan keyin AQShning ikkita yadro suv osti kemasi kerakli hududga yetib keldi"

Avvalroq Prezident Donald Tramp buyrug‘i bilan qayta joylashtirilgan AQShning ikkita yadro suv osti kemasi allaqachon belgilangan hududga yetib borgan.

Amerika yetakchisi bu haqda Bedminsterdan (Nyu-Jersi) Vashingtonga uchishidan oldin jurnalistlarga ma’lum qilgan. "Ular allaqachon mintaqada, bo‘lishi kerak bo‘lgan joyda" - dedi Tramp.

Avvalroq u Newsmax telekanaliga bergan intervyusida suvosti kemalari Rossiyaga yaqinroq joylashtirilishini ta’kidlagan, biroq ularning aniq manzilini ko‘rsatishdan bosh tortgan edi. Oq uy rahbari harbiylarni qayta joylashtirish qarorini Rossiya Federasiyasi Xavfsizlik kengashi raisi o‘rinbosari Dmitriy Medvedevning keskin bayonotlariga javob berish zarurati bilan izohladi.

28 iyul kuni Medvedev X ijtimoiy tarmog‘ida Trampni Rossiyaga tahdid qilish va ultimatum qo‘yish urush tomon qadam tashlash degani haqida ogohlantirgan. Keyinroq, 31 iyul kuni u Trampning Rossiya iqtisodiyoti haqidagi so‘zlariga izoh berdi va “o‘lik qo‘l” xavfini – buyruqbozlik zanjiri yo‘q qilingan taqdirda avtomatik yadro zarbasi tushunchasini esladi. "U yurgan o‘liklar haqidagi sevimli filmlarini eslab qolsin", deb yozdi Medvedev Telegram-kanalida.