Tramp chiqindi tashish mashinasida sayr qildi

Donald Tramp chiqindi tashish mashinasida sayr qildi. Siyosatchi shu tariqa amaldagi prezident Jo Baydenning Tramp tarafdorlarini "chiqindi" deb atagan so‘zlariga javob qaytardi. Bayden tegishli bayonotni Nyu Yorkda o‘tkazilgan Trampning saylovoldi mitingida komik Toni Xinchkliffning Puerto-Rikoni "suzib yuruvchi chiqindi oroli" deb atagan so‘zlariga munosabat tariqasida aytgan edi. AQSh rahbari Puerto-Riko aholisi "yaxshi, tartibli odamlar" ekanini alohida ta’kidlagan.

"Men ko‘rayotgan yagona chiqindi — bu uning (Trampning) tarafdorlaridir", — degan Bayden.

Keyinroq Oq uy prezident Tramp tarafdorlarini emas, aynan komikni nazarda tutganini bildirgan. Bunga javoban Tramp quyidagicha munosabat bergan:

"Baydenning bayonoti chin ma’noda sharmandali. Mening chiqindi tashuvchi mashinam qanday ekan? Bu Kamala va Jo Bayden uchun", — degan Tramp mashinadan boshini chiqarib.