Tramp AQShning sobiq prezidenti Bill Klintonning Epshteyn bilan aloqalarini tergov qilishni so‘radi

Oq uy rahbari AQSh Adliya vazirligi hamda Federal qidiruv byurosidan (FQB) mamlakatning sobiq prezidenti Bill Klinton, sobiq moliya vaziri Larri Sammers va LinkedIn asoschisi Rid Hoffmanning moliyachi va Jeffri Epshteyn bilan ehtimoliy aloqalarini tergov qilishni so‘radi.

Epshteyn voyaga yetmagan qizlarni majburiy jinsiy aloqaga jalb qilishda ayblangan va qamoqda o‘z joniga qasd qilgan.

"Men bosh prokuror Pem Bondi va Adliya vazirligini FQBning buyuk vatanparvarlari bilan birgalikda Jeffri Epshteynning Bill Klinton, Larri Sammers, Rid Hoffman, JPMorgan, Chase va boshqa ko‘plab odamlar va tashkilotlar bilan aloqalarini, ularning o‘rtasida nimalar bo‘lganini aniqlash maqsadida tergov qilishni so‘rash niyatidaman", — deb yozdi AQShning amaldagi prezidenti Truth Social ijtimoiy tarmog‘idagi sahifasida.

Epshteynning AQSh Demokratik partiyasi tomonidan e’lon qilingan sobiq moliya vaziri Sammers bilan yozishmalaridan birida u Trampni "judayam xavfli odam" deb atagan.

"Men juda ko‘p yomon odamlarni uchratganman, lekin ularning hech biri Trampga o‘xshamaydi. Trampning tanasida bitta ham yaxshi hujayra yo‘q. Shunday ekan, u xavfli odam", — deyiladi Epshteyn xabarida.