“Tolibon” chet ellik investorlarga Afg‘onistonda yashash uchun ruxsatnoma berish masalasini muhokama qilmoqda

“Tolibon” chet ellik investorlarga Afg‘onistonda yashash uchun ruxsatnoma berish masalasini muhokama qilmoqda.

Bu haqda “Tolibon” muvaqqat hukumatining Iqtisodiy komissiyasi yig‘ilishida ma’lum qilingan.

Ma’lumotlarga ko‘ra, komissiya chet el sarmoyadorlarini jalb qilish maqsadida ular uchun maxsus yashash ruxsatnomasi (rezidentlik) mexanizmini ishlab chiqishni rejalashtirmoqda. Ruxsatnoma berish tartibi investisiya hajmi va turiga qarab belgilanishi mumkin.

Shu bilan birga, mazkur tashabbus hozircha muhokama bosqichida ekani, uni tartibga soluvchi aniq qonun yoki rasmiy qaror qabul qilinmagani ta’kidlanmoqda. Mas’ul tuzilmalarga bu borada takliflar tayyorlash va keyingi yig‘ilishda taqdim etish vazifasi yuklatilgan.

Ekspertlarga ko‘ra, ushbu qadam “Tolibon”ning iqtisodiy vaziyatni yaxshilash va xorijiy investisiyalarni jalb qilishga qaratilgan siyosatining bir qismi hisoblanadi.

Hozircha gap barcha chet elliklar uchun emas, balki faqat investorlar uchun mo‘ljallangan ehtimoliy ruxsatnoma tizimi haqida bormoqda.