Tojikistonning tashqi qarzi uch oyda 87 million dollarga qisqardi

Tojikistonning tashqi qarzi 2025 yil 1 aprel holatiga ko‘ra 3 milliard 101 million dollarni tashkil qilgan. Bu yil boshiga nisbatan 87 million dollarga (2,7 foiz) kam. Ushbu ma’lumotlar Respublika Moliya vazirligi tomonidan taqdim etilgan.

Qarzning asosiy qismi (95,6%) davlat qarzi, yana 4,4 foizi davlat tomonidan kafolatlangan majburiyatlardir.

Xitoy eng katta kreditor bo‘lib qolmoqda - taxminan 1 milliard dollar. Tojikiston Jahon banki, Osiyo va Islom taraqqiyot banklari, shuningdek, Yevropa tiklanish va taraqqiyot bankidan ham katta miqdorda qarzdor.

2017 yilda Rog‘un GESi qurilishini moliyalashtirish uchun yig‘ilgan 500 million dollarlik yevroobligasiyalar bo‘yicha qarzdorlik saqlanib qolmoqda.

2025 yilgi budjetda tashqi qarzga xizmat ko‘rsatish va to‘lash uchun qariyb 4 milliard somoniy (taxminan 385 million dollar) mablag‘ nazarda tutilgan bo‘lib, shundan 3 milliard somoniydan ortig‘i asosiy qarzga, qariyb 1 milliard somoniysi foizlar to‘loviga to‘g‘ri keladi.

Qo‘shimcha 1,4 milliard somoniy (taxminan 135 million dollar) davlat kafolati ostida tashqi kredit olgan davlat korxonalari tomonidan to‘lanishi kerak.

Joriy yilda tashqi donorlarning yangi kreditlari bo‘yicha kelishuvlar ratifikasiya qilinganidan keyin tashqi qarz hajmi oshishi kutilmoqda.

Tojikiston prezidentining so‘nggi xabarida aytilishicha, Rog‘un GESi qurilishini yakunlash uchun rivojlanish bo‘yicha hamkorlardan 33 milliard somoniy (3 milliard dollar)dan ortiq mablag‘, jumladan, 20,5 milliard somoniy (1,9 milliard dollar) imtiyozli kreditlar va 12,5 milliard somoniy (1,1 milliard dollardan ortiq) grantlar jalb etilishi rejalashtirilmoqda.