Tailand Kambodjani sulhni buzganlikda ayblamoqda

Tailand armiyasi Kambodjani sulhni buzishda aybladi.

Bu haqda Tailand armiyasi vakiliga tayanib, AFP agentligi xabar berdi.

"O‘t ochishni to‘xtatish to‘g‘risida e’lon qilingandan so‘ng, Fu Makua hududida Kambodja tomoni tomonidan tartibsizliklar yuzaga kelgani, bu ikki tomon o‘rtasida otishmaga olib kelgani haqida xabarlar paydo bo‘ldi, bu otishma bugun ertalabgacha davom etdi”, — deya armiya matbuot kotibi Ritcha Suksuvanon so‘zlaridan iqtibos keltiradi AFP.

Avvalroq Malayziya bosh vaziri Anvar Ibrohim Kuala-Lumpurda bo‘lib o‘tgan Tailand bosh vaziri vazifasini bajaruvchi Pxumtxama Vechayachaya va Kambodja bosh vaziri Xun Manet o‘rtasidagi muzokaralar yakunlari bo‘yicha Osiyo davlatlari o‘rtasida sulh tuzilganini e’lon qilgan edi. Tailand va Kambodja o‘rtasidagi chegara hududida sulh 5 kun davom etgan harbiy to‘qnashuvlardan so‘ng 28 iyul, dushanba kuni kuchga kirdi.